အိုက်ပွီး၊ ဖေဖော်ဝါရီ ၂ ရက်၊ ကလေး
စစ်ကိုင်းတိုင်း ကလေးမြို့နယ်တောင်ပိုင်း တင်သားနဲ့ ဒိုးနွယ်ရွာကို စစ်ကောင်စီတပ်က လေကြောင်း ဗုံးကြဲတိုက်ခိုက်မှု ထပ်မံပြုလုပ်တာကြောင့် အရပ်သားနှစ်ဦး သေဆုံးခဲ့တယ်လို့ ဒေသခံတွေဆီက သိရပါတယ်။
ဒီနေ့ ဖေဖော်ဝါရီ ၂ ရက် မနက် ၁၁ နာရီ ၂၅ မိနစ်ဝန်းကျင်မှာ တင်သားနဲ့ ဒိုးနွယ်ရွာမှာ ဂျက်ဖိုက်တာတစ်စီးနဲ့ နှစ်ကြိမ် ဗုံးကြဲတိုက်ခိုက်တာလို့ သိရပါတယ်။
“ကလေးတောင်ပိုင်းမှာ ဗုံးကြဲတာ သုံးရက်ဆက်တိုက်ရှိပြီ။ ဒီနေ့မနက် နှစ်ယောက် ထပ်သေတယ်။ အရင်ရက်တွေက ဗုံးကြဲတဲ့ရွာတွေနဲ့တစ်ဆက်တည်း ရွာတွေပါပဲ။ အခု လူတွေက တိမ်းရှောင်တာတွေရှိတယ်” လို့ ဒေသခံတစ်ဦးက ရွှေဖီမြေသို့ ပြောပါတယ်။
တင်သားရွာက ကျေးလက်ကျန်းမာရေး ဆေးပေးခန်းတစ်ခုကို စစ်တပ်က မနေ့ ဖေဖော်ဝါရီ ၁ ရက် မနက်ပိုင်းက ဗုံးကြဲတိုက်ခိုက်ခဲ့ပြီး ဒီနေ့မနက်မှာ လေကြောင်းကနေ ဗုံး ထပ်ကြဲခဲ့တာ ဖြစ်ပါတယ်။
အခုလို ကလေးမြို့နယ်တောင်ပိုင်းမှာ စစ်တပ်က လေကြောင်းကနေ တိုက်ခိုက်ခဲ့တာဟာ သတင်းပေးသူတွေကြောင့် ဖြစ်တယ်လို့ ဒေသတွင်း တော်လှန်ရေးတပ်ဖွဲ့ဝင်တွေက ဆိုပါတယ်။
“ဒီဘက်မှာ စစ်ရေး လှုပ်ရှားမယ်ဆိုတာ စစ်တပ်သတင်းပေးတွေကြောင့် စစ်ကောင်စီတပ်က နေ့တိုင်းလိုလို ဗုံးကြဲတိုက်ခိုက်တာဖြစ်မယ်” လို့ ဒေသတွင်း တော်လှန်ရေးတပ်ဖွဲ့ဝင်တစ်ဦးက ရွှေဖီမြေသို့ ပြောပါတယ်။
ကလေးမြို့နယ်တောင်ပိုင်းမှာ စစ်တပ်ရဲ့ လေကြောင်း ဗုံးကြဲတိုက်ခိုက်မှုကြောင့် ကျေးရွာ ၇ ရွာက ဒေသခံ နှစ်သောင်းကျော်ဟာ ဘေးလွတ်ရာ ထွက်ပြေးတိမ်းရှောင်နေကြရတယ်လို့ သိရပါတယ်။
မနေ့ ဖေဖော်ဝါရီ ၁ ရက်ကလည်း ကုက္ကိုလ်ရွာထဲက စစ်ဘေးရှောင်တွေ နေထိုင်တဲ့ စာသင်ကျောင်းကို လေကြောင်းကနေ ဗုံးကြဲတိုက်ခိုက်လို့ ကလေးတွေအပါအဝင် ၁၁ ဦးထက်မနည်း သေဆုံးခဲ့ပါတယ်။
ဒါ့အပြင် ကလေးမြို့နယ်နဲ့ တစ်ဆက်တည်းရှိတဲ့ တမူးမြို့နယ် ပန်သာရွာကို မနေ့ညနေ ၆ နာရီ ၄၀ မိနစ်မှာ လေကြောင်းကနေ ဗုံးကြဲတိုက်ခိုက်မှု နှစ်ကြိမ် ပြုလုပ်ခဲ့ပါတယ်။
