အိုက်ပွီး၊ ဇန်နဝါရီ ၁၁ ရက်၊ ကျောက်တော်
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ကျောက်တော်မြို့ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သား ၂ ဦးနဲ့အထက် သေဆုံးပြီး ဒဏ်ရာ ရသူလည်း များတယ်လို့ ဒေသခံတွေဆီက သိရပါတယ်။
တိုက်ပွဲ ဖြစ်ပွားခြင်း မရှိတော့တဲ့ ကျောက်တော်မြို့ပေါ် ရှမ်းရွာဈေးနဲ့ ပန်းတိမ်တန်းမှာ ဒီနေ့ ဇန်နဝါရီ ၁၁ ရက် မနက် ၉ နာရီဝန်းကျင်က ဂျက်ဖိုက်တာနဲ့ ဗုံးကြဲတိုက်ခိုက်လို့ အရပ်သားတွေ ထိခိုက်သေဆုံးခဲ့တာ ဖြစ်ပါတယ်။
“ရှမ်းရွာဈေးနဲ့ ပန်းတိမ်တန်းမှာ ဗုံးသီး သုံးလုံး လေးလုံးလောက် ကျတယ်။ နှစ်ယောက်တော့ ပွဲချင်းပြီး သေဆုံးတယ်။ ရှမ်းရွာဈေးမှာ လူတွေ ဈေးဝယ်ချိန် ဗုံးကြဲတယ်ဆိုတော့ သေဆုံးမှုက အဲထက် ပိုများမယ်။ ဒဏ်ရာ ရတဲ့သူတွေလည်း များမယ်” လို့ ကျောက်တော်ဒေသခံတစ်ဦးက ရွှေဖီမြေသို့ ပြောပါတယ်။
လေကြောင်း ဗုံးကြဲတိုက်ခိုက်မှုနဲ့ ပတ်သက်လို့ ဒေသခံတွေဟာ လေကြောင်းရန် အန္တရာယ်ကြောင့် ကူညီပေးဖို့ မသွားရဲတဲ့အတွက် အရပ်သား ထိခိုက်သေဆုံးမှုစာရင်း အတိအကျ မသိရသေးဘူးလို့ ဆိုပါတယ်။
ဒီနေ့မနက်က ကျောက်တော်မြို့မှာ လေကြောင်း ဗုံးကြဲတိုက်ခိုက်မှုဟာ အရပ်သား ထိခိုက်သေဆုံးမှု အရေအတွက် များနိုင်တယ်လို့ သိရပါတယ်။
ဇန်နဝါရီ ၈ ရက်ကလည်း AA ထိန်းချုပ်ထားတဲ့ ရမ်းဗြဲမြို့နယ် ကျောက်နီမော်ရွာမှာ လေကြောင်းကနေ ဗုံးကြဲတိုက်ခိုက်လို့ အရပ်သား ၂၆ ဦး သေဆုံးပြီး ၁၅ ဦး ထိခိုက်ဒဏ်ရာ ရရှိခဲ့တယ်လို့ AA က မနေ့ ဇန်နဝါရီ ၁၀ ရက်မှာ သတင်းထုတ်ပြန်ထားပါတယ်။
စစ်တပ်က အာဏာသိမ်းပြီးနောက် နိုင်ငံတစ်ဝှမ်း လေကြောင်း ဗုံးကြဲတိုက်ခိုက်မှုအပါအဝင် သတ်ဖြတ်ခံရမှုကြောင့် အရပ်သား ၆,၁၃၁ ဦး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း- AAPP က မနေ့ ဇန်နဝါရီ ၁၀ ရက်မှာ ထုတ်ပြန်ထားပါတယ်။
