မိုင်းအရှိုင်း၊ မေလ ၂၁ ရက်၊ မိုးကုတ်
တအာင်းတပ် – TNLA ဖမ်းဆီးချုပ်နှောင်ထားတဲ့အတောအတွင်းမှာ မိုးကုတ်ဒေသခံ ၂ ဦး သေဆုံးသွားခဲ့တယ်လို့ TNLA နဲ့ နီးစပ်တဲ့သတင်းရင်းမြစ်က ရွှေဖီမြေကို အတည်ပြုပြောဆိုပါတယ်။
မန္တလေးတိုင်းနဲ့ ရှမ်းမြောက်အစပ်မှာရှိတဲ့ မိုးကုတ်မြို့ နေ ကိုကိုအောင်ကို မူးယစ်ဆေးဝါးသုံးစွဲတယ်ဆိုတဲ့စွတ်စွဲချက်နဲ့ ပြီးခဲ့တဲ့ မေလ ၅ ရက်မှာဖမ်းဆီးချုပ်နှောင်ထားတာဖြစ်တယ်လို့ သူက ဆိုပါတယ်။
“မသင်္ကာမှုနဲ့ ဖမ်းသွားတဲ့ တစ်ယောက်က မူးယစ်ဆေးဝါးအလွန်အကျွံသုံးထားတာ။ သူ့ခန္ဓာကိုယ်ထဲမှာ ရောဂါတွေရှိနေပြီ။ အဲတာကြောင့်မို့ ဖမ်းချုပ်ထားတာ ၁ ညပဲရှိသေးတယ်။ မနက်ခင်းရောက်တော့ သူရောဂါဖောက်လို့ ဆေးရုံသွားပို့ဖို့လုပ်တဲ့အချိန်မျာ ရဲကားပေါ်မှာပဲ ဆုံးသွားတာ”
ဒါ့အပြင် မေလ ၈ ရက်နေ့မှာလည်း ကိုဇော်ဇော်ကိုဆိုသူကို မူးယစ်ရမ်းကားမှုနဲ့ TNLA က ထပ်မံဖမ်းဆီးလိုက်ပြီး ၃ ရက်မြောက်နေ့ မေလ ၁၁ ရက်မှာ သေဆုံးခဲ့ပါတယ်။
ကိုဇော်ဇော်ကို TNLA က ရိုက်နှက်နှပ်စက်တာမျိုးတွေရှိတယ်လို့ မဲခေါင်သတင်းဌာနက ဒေသခံပြောကြားချက်ကို ကိုးကားပြီး ဖော်ပြချိန်မှာ ကိုဇော်ဇော်က အရက်ရဲ့အရှိန်ကြောင့် ဖမ်းဆီးချုပ်နှောင်ထားတာကြောင့် ဆုံးသွားတယ်လို့ TNLA နဲ့နီးစပ်တဲ့ သတင်းရင်းမြစ်က ရွှေဖီမြေကို ပြောပြပါတယ်။
“သူမူးပြီး ရပ်ကွက်အုပ်ချုပ်ရေးမှူးရိုက်မယ်လုပ်တော့ ရဲတွေက ချုပ်ထားလိုက်တာ။ ရဲစခန်းရောက်တော့ နံရံကို လက်သီးနဲ့ထိုး၊ နဖူးနဲ့ ရိုက်လုပ်တာ။ အရက်မသောက်ရလို့ ပါးစပ်အမြှုပ်ထွက်ပြီးဆုံးသွားတာ” လို့ ဆိုပါတယ်။
TNLA ဖမ်းဆီးထိန်းသိမ်းတာကြောင့် သေဆုံးသူ ၂ ဦးရှိလာတာနဲ့ ပတ်သက်ပြီး ရွှေဖီမြေက အသေးစိတ်အချက်အလတ်ကို ဆက်လက်စုံစမ်းနေဆဲဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
