လွေးထွေး၊ ဇန်နဝါရီ ၃၁ ရက်၊ မိုးကုတ်
ပြီးခဲ့တဲ့ ၁၀၂၇ စစ်ဆင်ရေး ပထမလှိုင်းကတည်းက လောက်ကိုင်မြို့ကနေ နေရပ်သို့ ပြန်လာတဲ့ မိုးကုတ်မြို့နယ်က အမျိုးသား ၂ ဦးကို ကိုးကန့်တပ်- MNDAA က ဖမ်းဆီးသွားခဲ့ပြီး ဒီနေ့အထိ မိသားစုဝင်နဲ့ ဆက်သွယ်လို့ မရသေးကြောင်း ကာယကံရှင်ရဲ့ အစ်ကိုဖြစ်သူ ပြောပြချက်အရ သိရပါတယ်။
လောက်ကိုင်မှာ တိုက်ပွဲ ဖြစ်ပွားချိန် နေရပ်ပြန်လာတဲ့ လမ်းတစ်ဝက်မှာ ဖမ်းဆီးခံခဲ့ရပြီးနောက် သိန္နီမြို့မှာ တာဝန်ထမ်းဆောင်ရကြောင်း မိသားစုဝင်ကို အကြောင်းကြားခဲ့ပြီး လားရှိုး မြို့သိမ်းတိုက်ပွဲတုန်းက မိသားစုနဲ့ နောက်ဆုံး ဆက်သွယ်ခဲ့တာ ဖြစ်ပါတယ်။
ကာယကံရှင်ရဲ့ အစ်ကိုဖြစ်သူက “သူ ကိုးကန့်စစ်သား လုပ်နေရတာ သိတယ်။ အခုက အဆက်အသွယ် မရတော့ အိမ်ကလူတွေ စိတ်ပူနေကြတာ။ အဆက်အသွယ် မရတာလည်း ကြာပြီ။ သေသလား ရှင်သလား မသိရဘူး။ သူ့သူငယ်ချင်းရော အတူတူဘဲ။ ဆက်သွယ်လို့ မရဘူး” လို့ ပြောပါတယ်။
ဖမ်းဆီးခံခဲ့ရသူတွေထဲက တစ်ဦးဟာ မိုးကုတ်မြို့ အုန်းပင်ရေထွက် ပလောင်ကုန်းရပ်ကွက်နေ အသက် ၁၉ နှစ်အရွယ် ထွန်းနိုင်ဦးခေါ် မောင်သက်နဲ့ နောက်ထပ်တစ်ဦးက မိုးကုတ်မြို့နယ် ပိန်းပြစ်ရွာကဖြစ်ပြီး နာမည်နဲ့အသက်ကိုတော့ မသိရပါဘူး။
အလားတူ ပြီးခဲ့တဲ့ ၁၀၂၇ စစ်ဆင်ရေး ပထမလှိုင်းကတည်းက လောက်ကိုင် မြို့သိမ်းတိုက်ပွဲ ဖြစ်ပွားချိန် အလုပ် တက်လုပ်ကြတဲ့ ရှမ်းမြောက်ကလူထုနဲ့ တခြားမြို့နယ်က လူထုအများစုကို လမ်းတစ်ဝက်မှာ MNDAA က စစ်ဆေးမေးမြန်းပြီး စစ်မှုထမ်းဖို့ ခေါ်ဆောင်ခံခဲ့ရသူ ထောင်ချီ ရှိခဲ့တယ်လို့ နေရပ်ပြန်လာသူ ဒေသခံတွေရဲ့ ပြောပြချက်အရ သိရပါတယ်။
