လွေးလာဝ်ဇာရ်၊ ဧပြီ ၂၀ ရက်၊ မိုင်းယော်
ရှမ်းမြောက် လားရှိုးခရိုင် မိုင်းယော်တိုက်နယ် လွိုင်လင်ကျေးရွာအုပ်စု မန်ကန်ရွာက ဒေသခံနှစ်ဦးဟာ တောထဲ နွားလိုက်ရှာရင်း မိုင်းနင်းမိပြီး တစ်ဦးသေဆုံးကာ တစ်ဦး ဒဏ်ရာရခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ဖြစ်စဉ်ဟာ ဧပြီ ၁၈ ရက် နေ့လယ် ၂ နာရီခွဲမှာ ဖြစ်ပွားခဲ့တာဖြစ်ပြီး မိုင်းနင်းမိတဲ့အချိန်မှာ ဖခင်ဖြစ်သူက ပွဲချင်းပြီး သေဆုံးခဲ့ပြီးတော့ သားဖြစ်သူ မိုင်းအောင်ဆာ (၁၅ နှစ်)က ဒဏ်ရာ ရခဲ့တာပါ။
ဖြစ်စဉ်သိရှိသူ အမျိုးသားတစ်ဦးက “နွားပျောက်လို့ လိုက်ရှာတာ။ မိုင်းနင်းမိတာတော့ဟုတ်တယ်။ ဘယ်လိုမိုင်းကို နင်းမိလဲဆိုတာကိုတော့ သူ့သားကို မေးလို့မရဘူး။ ပြောရမယ်ဆိုရင် သူ့သားက ကျပ်မပြည့်ဘူး” လို့ ပြောပါတယ်။
မိုင်း နင်းမိတဲ့နေရာတဝိုက်ဟာ ၂၀၂၃ ခုနှစ်က ဖော်ဆောင်ခဲ့တဲ့ ၁၀၂၇ စစ်ဆင်ရေး ပထမလှိုင်းမတိုင်ခင် ကိုးကန့်တပ်- MNDAA နဲ့ စစ်ကောင်စီတပ်တို့ တိုက်ပွဲ ဖြစ်ပွားခဲ့တဲ့နေရာဖြစ်ပြီး သားအဖနှစ်ဦး မိုင်းနင်းမိတဲ့နေရာဟာ စစ်တပ်က ယာယီ စခန်းချတဲ့နေရာ ဖြစ်တယ်လို့ အထက်ပါအမျိုးသားက ဆက်ပြောပါတယ်။
ပြီးခဲ့တဲ့ ဧပြီ ၁၆ ရက်ကလည်း တအာင်းတပ်မတော် ထိန်းချုပ်ထားတဲ့ သီပေါမြို့နယ် တုံစင့်ရွာက အမျိုးသားတစ်ဦးဟာ စစ်ကောင်စီတပ်ရဲ့ တပ်စခန်းဟောင်း ၂၃ ထဲ ငှက် ပစ်ရာကနေ မိုင်းနင်းမိလို့ ဘယ်ခြေထောက် ဆုံးရှုံးခဲ့ရပါတယ်။
