ခိုင်လေး၊ မတ်လ ၁၁ ရက်၊ မတ္တရာ
မန္တလေးတိုင်း မတ္တရာမြို့နယ်မှာ စစ်ကောင်စီတပ်က လက်နက်ကြီး ရမ်းသမ်းပစ်ခတ်တိုက်ခိုက်ခဲ့တာကြောင့် ဒေသခံ ၂ ဦး သေဆုံးခဲ့တယ်လို့ Voice Of Mandalay မှ တာဝန်ရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၉ ရက် မနက် ၁၀ နာရီခွဲက မတ္တရာဘောလုံးကွင်းမှာ တပ်စွဲထားတဲ့ စစ်ကောင်စီတပ်သားက လက်နက်ကြီးနဲ့ ဒေသခံတွေ နေထိုင်တဲ့ မတ္တရာမြို့နယ် ဆည်တော်လေးရွာ လမ်းခွဲကို ပစ်ခတ် တိုက်ခိုက်ခဲ့တာလို့ ဆိုပါတယ်။
“မနေ့ကတော့ ၉ လုံး ပစ်ခဲ့ပြီး ပြည်သူ ၂ ဦးသေတယ်ဗျ။ စကစဘက်က ရမ်းသမ်းပစ်ခတ်တာဗျ။ ၉ လုံးတိတိ ပစ်ခတ်ခဲ့တာ။ မတ္တရာရဲ့တခြားနေရာတွေလည်း ပစ်ချင်ပစ်နိုင်တယ်။ မနေ့က ပစ်တဲ့အထဲမှာတော့ ဒဏ်ရာရသူမရှိ။ နောက်ဆက်တွဲကို ကျနော်တို့ စုံစမ်းလို့ မရလိုက်ဘူးဗျ။ လိုင်းအခြေအနေကြောင့်ပါ”
စစ်တပ်က ပစ်ခတ်တဲ့ လက်နက်ကြီး ၉ လုံး ထဲ ဆည်တော်လေးရွာလမ်းခွဲကို လက်နက်ကြီးတချို့ ကျရောက်ပေါက်ကွဲခဲ့ပြီး ဒေသခံ ၂ ဦး သေဆုံးခဲ့တယ်လို့ ဆိုပါတယ်။
ပြီးခဲ့တဲ့ မတ်လ ၄ ရက်က မန္တလေးတိုင်း တောင်သာမြို့နယ်ရှိ နတ်စောင့်ရွာကို စစ်တပ်က လေကြောင်းကနေ ဗုံးကြဲခဲ့တာကြောင့် ဒေသခံ ၆ ဦး သေဆုံးခဲ့ပြီး အများစု ထိခိုက်ဒဏ်ရာ ရရှိခဲ့တဲ့အပြင် လူနေအိမ်လည်း မီးလောင်ပျက်စီးခဲ့ပါတယ်။
၂၀၂၁ ခုနှစ် ဖေဖော်ဝါရီ ၁ ရက်က စစ်အာဏာသိမ်းမှု စတင်ချိန်ကနေ ၂၀၂၅ ခုနှစ် မတ်လ ၁၀ ရက်အထိ စစ်အုပ်စုနဲ့ ၎င်းရဲ့လက်ပါးစေကြောင့် နွေဦးတော်လှန်ရေးကာလအတွင်း ဒီမိုကရေစီအရေး လှုပ်ရှားသူနဲ့ ဒေသခံ (၆,၃၈၉)ဦး သေဆုံးခဲ့ပြီဖြစ်တယ်လို့ AAPP က ဒီနေ့ မတ်လ ၁၀ ရက်မှာ ထုတ်ပြန်ထားပါတယ်။
ပြီးခဲ့တဲ့ တစ်ပတ်တာအတွင်း နိုင်ငံတဝန်းရှိ တိုင်းနဲ့ ပြည်နယ်တချို့ကို စစ်တပ်က မြေပြင်မှ စစ်ကြောင်းထိုး ဝင်ရောက်တာ၊ လေကြောင်း၊ လက်နက်ကြီးနဲ့ ပစ်ခတ်တာတွေကြောင့် ဒေသခံ ထိခိုက်သေဆုံးတာ၊ အဆောက်အဦး ပျက်စီးဆုံးရှုံးတာ များလာတဲ့အပြင် ဒေသခံတွေလည်း ဘေးလွတ်ရာ ထွက်ပြေးတိမ်းရှောင်နေကြရတယ် လို့ ဆိုပါတယ်။
