လွေးထွေး၊ မေလ ၁၆ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ်ရှိ စစ်ရှောင်စခန်းတစ်ခုကို စစ်ကောင်စီတပ်က ထပ်မံဗုံးကြဲတိုက်ခိုက်လို့ အရပ်သား ၂ ဦး ပွဲချင်းပြီး သေဆုံးခဲ့ပြီး ကလေးငယ်တွေအပါအဝင် ၉ ဦး ဒဏ်ရာရခဲ့ကြောင်း ပြင်ဦးလွင်ခရိုင် ပကဖသတင်းမှ တာဝန်ရှိသူရဲ့ ပြောပြချက်အရ သိရပါတယ်။
မနေ့ မေလ ၁၅ ရက် မနက် ၉ နာရီ ဝန်းကျင်မှာ သပိတ်ကျင်းမြို့နယ် ၉ မိုင် ကျေးရွာနဲ့ လမ်းလယ်ကျစ်ကျေးရွာ ကြားရှိ စစ်ဘေးရှောင်စခန်းကို ဂျက်ဖိုက်တာနဲ့ ဗုံးကြဲခဲ့လို့ အသက် ၆၀ အရွယ် အမျိုးသား တစ်ဦးနဲ့ အမျိုးသမီး တစ်ဦးတို့ သေဆုံးခဲ့ပြီး ကလေး ၄ ဦးနဲ့ သံဃာ တစ်ပါးအပါအဝင် ၉ ဦး ဒဏ်ရာရခဲ့ပါတယ်။
ပြင်ဦးလွင်ခရိုင် ပကဖသတင်းမှ တာဝန်ရှိသူက “ဒီဘက်တွေက အရပ်သားတွေဟာ စကစရဲ့ ပစ်မှတ်ဖြစ်နေတာကြောင့် ဂရုတစိုက်နေထိုင်ဖို့လိုတယ်။ လေကြောင်းရန် ကာကွယ်ဖို့ ဗုံးခိုကျင်းတွေ တူးထားဖို့လိုတယ်” လို့ ပြောပါတယ်။
ပြီးခဲ့တဲ့ မေလ ၁၂ ရက် ကလည်း TNLA သွားလာလှုပ်ရှားတဲ့ သပိတ်ကျင်းမြို့နယ် ညောင်ပင်သာရွာကို ဂျက်ဖိုက်တာနဲ့ ၂ ကြိမ် ဗုံးကြဲချတိုက်ခိုက်ခဲ့လို့ ဒေသခံ ၄ ဦး ဒဏ်ရာရခဲ့တယ်လို့ TNLA ရဲ့ထုတ်ပြန်ချက်အရ သိရပါတယ်။
အလားတူ မေလ ၁၀ ရက် နေ့လယ် ၁ နာရီဝန်းကျင်မှာလည်း ဂျက်ဖိုက်တာနဲ့ စဉ့်ကူးမြို့နယ် ကျည်တောက်ပေါက်ကျေးရွာကို ဗုံးကြဲခဲ့လို့ ကလေးအပါအဝင် ၅ ဦး သေဆုံးခဲ့ပြီး ၃ ဦးအပြင်းအထန် ဒဏ်ရာရခဲ့သလို ၁ နာရီခွဲမှာ သပိတ်ကျင်းမြို့နယ် ဇရပ်ကွင်း ကျေးရွာကို ထပ်မံဗုံးကြဲခဲ့လို့ အရပ်သား ၁ ဦး သေဆုံးခဲ့ပြီး ၇ ဦး ဒဏ်ရာရခဲ့ပါတယ်။
