လွေးလာဝ်ဇာရ်၊ နိုဝင်ဘာ ၃၀ ရက်၊ ဖားကန့်
ကချင်ပြည်နယ် ဖားကန့်မြို့မှာ စစ်ကောင်စီတပ် ပစ်ခတ်တဲ့ လက်နက်ကြီးကြောင့် ဒေသခံ ၂ ဦး ဒဏ်ရာ ရရှိခဲ့တယ်လို့ ဖားကန့်ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ နိုဝင်ဘာ ၂၇ ရက် ညနေပိုင်းမှာ ဖားကန့်ဗျူဟာကုန်းကနေ မနရွာထဲ စစ်တပ်က လက်နက်ကြီး ပစ်ခတ်တာကြောင့် လင်မယားနှစ်ဦး ဒဏ်ရာ ရခဲ့တယ်လို့ ဆိုပါတယ်။
ဖားကန့်ဒေသခံ အမျိုးသားတစ်ဦးက “ဟုတ်ပါတယ် သုံးရက်လောက် ရှိပြီ။ ကိုယ်တိုင်တော့ သွားမကြည့်ဘူး။ လင်မယားနှစ်ယောက် ထိတာတဲ့။ တစ်ယောက်ကတော့ ဒဏ်ရာ ပြင်းထန်တယ်လို့ ပြောတယ်။ စစ်တပ်ဘက်ကတော့ စိတ်ကူးပေါက်ရင် ပေါက်သလို ပစ်နေတာဘဲ။ နေ့တိုင်းလိုလို ပစ်နေတာ” လို့ ပြောပါတယ်။
ပြီးခဲ့တဲ့ နိုဝင်ဘာ ၁၈ ရက်မှာလည်း ဖားကန့်မြို့ မရှီကထောင်အုပ်စု ကျန်ဂတ်မှော်ရှိ ကျောက်လုပ်ကွက်တစ်ခုကို စစ်တပ်က ဒရုန်းနဲ့ ဗုံး ၃ လုံး ကြဲချတိုက်ခိုက်ခဲ့တာကြောင့် ဒေသခံ အမျိုးသား ၂ ဦး ဒဏ်ရာ ရရှိခဲ့ပါတယ်။
အလားတူ နိုဝင်ဘာ ၁၃ ရက် နေ့လယ် ၁၂ နာရီ ၃၆ မိနစ်မှာလည်း စစ်တပ်က ဖားကန့်မြို့ ဗျူဟာကုန်းကနေ လက်နက်ကြီး ပစ်ခတ်တာကြောင့် ဖားကန့်မြို့နယ် လုံးခင်းအုပ်စု ဖဝါရွာရှိ မူကြိုကျောင်းဝန်းထဲ လက်နက်ကြီး ကျရောက်ပေါက်ကွဲခဲ့ရာ ကျောင်းဆရာမ ၁ ဦးနဲ့ ၄ နှစ်အရွယ် မူကြိုကလေး ၁ ဦး ဒဏ်ရာ ရရှိခဲ့ဖူးပါတယ်။
ဖားကန့်မှာ စစ်တပ်က နေ့စဉ်လိုလို လက်နက်ကြီးနဲ့ဒရုန်း အသုံးပြုကာ ဗုံးကြဲတိုက်ခိုက်နေတာကြောင့် ဒေသခံ ထိခိုက်သေဆုံးမှုလည်း နေ့စဉ် ရှိနေပြီး လက်ရှိမှာတော့ စစ်တပ်နဲ့ KIA ပူးပေါင်းတပ်အကြား စစ်ရေး တင်းမာနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
