ပျားကြီး၊ ဧပြီ ၁၆ ရက်၊ မန္တလေး
မန္တလေးမြို့ပေါ်မှာ မိုးရွာသွန်းမှုကြောင့် ငလျင်ဒဏ်သင့် အဆောက်အဦး ၂ ခု ထပ်မံ ပြိုကျခဲ့တယ်လို့ ဒေသခံတွေက ပြောပါတယ်။
မနေ့ ဧပြီ ၁၅ ရက် ညနေပိုင်းမှာ ရွာသွန်းခဲ့တဲ့ မိုးကြောင့် အောင်မြေသာစံနဲ့ ချမ်းအေးသာစံမြို့နယ်က အထပ်မြင့် အဆောက်အဦး ၂ ခု ပြိုကျခဲ့တာပဲ ဖြစ်ပါတယ်။
“ညနေပိုင်း မိုးစရွာပြီး မကြာဘူး ၂၆ လမ်းက အဆောက်အဦး ပြိုကျတာ။ မိုးက အရမ်းများတော့ စိုးရိမ်ထားတဲ့အတိုင်း ဖြစ်လာတာပဲ” လို့ အောင်မြေသာစံမြို့နယ်မှ ပရဟိတသမားတစ်ဦးက ပြောပါတယ်။
အောင်မြေသာစံမြို့နယ် ၂၆ လမ်း၊ လမ်း ၈၀ နဲ့ ၈၁ လမ်းကြားက စတိုးဆိုင် အဆောက်အဦးဟာ ညနေပိုင်းမှာ ပြိုကျခဲ့တာဖြစ်ပြီး ချမ်းအေးသာဇံမြို့နယ် ပဲဝင်းက အဆောက်အဦးကတော့ ညပိုင်း ၁၀ နာရီခွဲဝန်းကျင်မှာ ပြိုကျခဲ့တာပါ။
အဆောက်အဦး ပြိုကျမှု ၂ ခုစလုံးမှာ လူထိခိုက်မှုတော့ မရှိဘူးလို့ ဒေသခံတွေက ပြောဆိုပါတယ်။
မတ်လ ၂၈ ရက်က လှုပ်ခတ်ခဲ့တဲ့ စစ်ကိုင်းငလျင်ကြောင့် မန္တလေးမြို့မှာ နေအိမ်အဆောက်အဦးပေါင်း ထောင်နဲ့ချီ ပျက်စီးခဲ့ပြီး လူတွေလည်း ထောင်နဲ့ချီ သေဆုံးခဲ့ပါတယ်။
