မိုင်းပန်ပျော်၊ မေလ ၂၄ ရက်၊ တောင်ကြီး
ရှမ်းတောင် တောင်ကြီးမြို့ကနေ ဟိုပုံးမြို့သွားတဲ့လမ်းမှာ ဆီဘောက်ဆာတင်တဲ့ ကားတစ်စီးက တိမ်းမှောက်ပြီး မီးလောင်မှုဖြစ်ပွားခဲ့တာကြောင့် အရပ်သား ၂ ဦးသေဆုံးပြီး ၄ ဦးဒဏ်ရာရခဲ့တယ်လို့ ဒေသခံတွေထံက စုံစမ်းသိရှိရပါတယ်။
ဖြစ်စဉ်ဟာ မနေ့ မေလ ၂၃ ရက် ညနေ ၅ နာရီခွဲ ဝန်းကျင် တောင်ကြီး-ဟိုပုံးလမ်း တိုးဂိတ်အပေါ်ဖက် နောင်လန်ရွာမှာ ဆီဘောက်ဆာကားတစ်စီးက ဘရိတ်ပေါက်ပြီး အရှိန်မထိန်းနိုင်တော့တာကြောင့် ၅ စီးဆင့် ယာဉ်တိုက်မှုဖြစ်ပွားပြီး မီးလောင်ခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“တောင်ကြီး ဟိုပုံးလမ်း တိုးဂိတ် အပေါ်ဖက် နောင်လန်ရွာမှာ ဆီဘောက်ဆာကား ဘရိတ်ပေါက်ပြီး အရှိန်လွန်သွားတာ။ ကား ၄ စီး ဆိုင်ကယ် ၁ စီးဆိုတော့ ၅ စီးဆင့်ယာဥ်တိုက်မှုဖြစ်သွားတာ ကားရော အကုန်လုံး မီးလောင်သွားတယ်။ ထိတာတော့ ၂ ဦးသေတယ် ၄ ဦးဒဏ်ရာရတယ် တစ်ဦး စိုးရိမ်ရတယ်”
အခင်းဖြစ်တဲ့နေရာကို တောင်ကြီးကြက်ခြေနီအသင်းက သွားရောက်ကူညီခဲ့ပြီး ဒဏ်ရာရတဲ့လူတွေကို တောင်ကြီး စဝ်စံထွန်းဆေးရုံမှာ ပို့ဆောင်ထားပြီးဆေးကုသမှုခံယူနေတယ်လို့ ၎င်းကဆက်ပြောပါတယ်။
မီးလောင်ကျွမ်းတဲ့ နေရာကို သက်ဆိုင်ရာ မြို့နယ်နဲ့ ခရိုင် မီးသတ်တပ်ဖွဲ့တွေက မိနစ် ၄၀ အတွင်း မီးငြိမ်းနိုင်ခဲ့တယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
