မိုင်းရူပ၊ ဇန်နဝါရီ ၃ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် ချောင်ကြီးရွာကို စစ်ကောင်စီတပ်က ဗုံးကြဲတိုက်ခိုက်ခဲ့လို့ အရပ်သား ၂ ဦး သေဆုံးပြီး ၃၀ နီးပါး ဒဏ်ရာ ရခဲ့တယ်လို့ သပိတ်ကျင်းမြို့နယ် LOCAL ပြောက်ကျားတပ်ဖွဲ့က ဒီနေ့ ဇန်နဝါရီ ၃ ရက်မှာ သတင်းထုတ်ပြန်လာပါတယ်။
မနေ့ ဇန်နဝါရီ ၂ ရက် ည ၈ နာရီဝန်းကျင်မှာ စစ်တပ်က တိုက်ပွဲ ဖြစ်ပွားတာမရှိဘဲ ချောင်းကြီးရွာကို ဂျက်ဖိုက်တာနဲ့ ဗုံး ၂ ကြိမ် ကြဲချတိုက်ခိုက်ခဲ့တာ ဖြစ်ပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် အရပ်သား ၂ ဦး သေဆုံးပြီး ၁၆ ဦး အပြင်းအထန် ဒဏ်ရာ ရရှိကာ ၁၁ ဦးကတော့ မစိုးရိမ်ရတဲ့ဒဏ်ရာ ရခဲ့တယ်လို့ ဆိုပါတယ်။
“ဒဏ်ရာ ရသူတွေကို ညတွင်းချင်း ဆေးရုံကို ပို့ပြီး ဆေးကုသမှု ခံယူစေခဲ့ပါတယ်ဗျ။ ဒဏ်ရာရထဲက သေဆုံးမှုတော့ မရှိသေးပါဘူး” လို့ သပိတ်ကျင်းမြို့နယ် LOCAL ပြောက်ကျားတပ်ဖွဲ့ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် နေအိမ် ၂၃ လုံး၊ မီးသတ်ရုံး၊ ဘာသာရေးအဆောက်အဦး (နတ်နန်း)၊ မေတ္တာစမ်းရေ လူမှုကယ်ဆယ်ရေးရုံးနဲ့ ကူညီကယ်ဆယ်ရေးကား ၅ စီးလည်း ထိခိုက်ပျက်စီးခဲ့တယ်လို့ သပိတ်ကျင်းမြို့နယ် LOCAL ပြောက်ကျားတပ်ဖွဲ့က ဆိုပါတယ်။
စစ်တပ်ဘက်ကတော့ သပိတ်ကျင်းမြို့နယ်က လေကြောင်း တိုက်ခိုက်မှုနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ၂၀၂၄ ခုနှစ် နိုဝင်ဘာ ၁၆ ရက်မှာလည်း သပိတ်ကျင်းမြို့နယ် ရေညာဦးနဲ့ ကျောက်ဖြူရွာကို စစ်တပ်က ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ သားအမိ ၂ ဦးပွဲချင်းပြီး သေဆုံးသွားတယ်လို့ ရွှေဖီမြေက စုံစမ်းသိရှိရပါတယ်။
သပိတ်ကျင်းမြို့ကို၂၀၂၄ ဩဂုတ် ၂၅ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်ထားနိုင်ခဲ့ပြီး လက်ရှိမှာ စစ်ကောင်စီရဲ့ တန်းမြင့် လေ့ကျင့်ရေးကျောင်း အမှတ်(၁၃)၊ ၇ မိုင်နဲ့ တွင်းငယ်ရွာမှာ စစ်တပ်စခန်းတွေ ကျန်ရှိနေသေးတာပဲ ဖြစ်ပါတယ်။
