ပို့လဘား၊ ဖေဖော်ဝါရီ ၁၃ ရက်၊ ညောင်ရွှေ
ရှမ်းတောင် ညောင်ရွှေမြို့နယ်မှာ စစ်ကောင်စီတပ် ပစ်ခတ်တဲ့ လက်နက်ကြီးကြောင့် ကလေးတစ်ဦးအပါအဝင် အရပ်သား ၂ ဦး သေဆုံးပြီး ၂ ဦး ဒဏ်ရာ ရခဲ့တယ်လို့ အင်းလေးဒေသ လူ့အခွင့်အရေးလှုပ်ရှားသူတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၂ ရက် ညနေ ၅ နာရီဝန်းကျင်မှာ ညောင်ရွှေမြို့နယ် တောင်ပို့ကွဲရွာကို စစ်တပ်နဲ့ ၎င်းရဲ့ လက်အောက်ခံ ပြည်သူ့စစ်- PNO က ပစ်ခတ်တဲ့လက်နက်ကြီး ပေါက်ကွဲမှုကြောင့် ကလေးတစ်ယောက်အပါအဝင် အရပ်သား ၂ ဦးသေဆုံးပြီး ၂ ဦး ဒဏ်ရာ ရရှိခဲ့တာပါ။
“အဲဒီ ဆုံးသွားတဲ့ကလေးနဲ့ သူ့အဖေက ဦးစိုဝ်လုံရဲ့အိမ် သွားလည်တာပေါ့နော်။ အဲအိမ်ကို လက်နက်ကြီးကျတော့ သူတို့သားအဖထိသွားတာ သူ့အဖေကတော့ လက်မှာဒဏ်ရာ ရတယ်။ ကလေးနဲ့ အိမ်ရှင်ကတော့ ပွဲချင်း သေသွားတယ်။ အခုလည်း လက်နက်ကြီးတွေ ထုနေတယ်”
ကျရောက်ပေါက်ကွဲမှုကြောင့် ၁၀ နှစ်အရွယ် မောင်စိုင်းလျန်ဆိုင်နဲ့ အသက် ၄၀ ကျော်အရွယ် ဦးစိုဝ်လုံဟာ သေဆုံးခဲ့ပြီး အသက် ၄၀ နှစ်ရှိတဲ့ ဒေါ်နန်းဖန်နဲ့ ၄၅ နှစ်ရှိတဲ့ ဦးကျားက ဒဏ်ရာ ရရှိခဲ့တာလို့ ဆိုပါတယ်။
အလားတူ ပင်လောင်းမြို့နယ် နန်းတုတ်ရွာကိုလည်း စစ်တပ်နဲ့ PNO ပစ်ခတ်တဲ့ မီးလောင်ဗုံးအပါအဝင် လက်နက်ကြီးကြောင့် နေအိမ် ၂ လုံး ပျက်စီးခဲ့တယ်လို့ ပြောပါတယ်။
ပြီးခဲ့တဲ့ ဖေဖော်ဝါရီ ၅ ရက်က ရေပူရွာအနီးက ဘုရားတောင် လွယ်နွှဲရွာလည်း စစ်တပ်ရဲ့ လက်နက်ကြီး ပစ်ခတ်မှုကြောင့် ဒေသခံ ၃ ဦး သေဆုံးပြီး ၆ ဦး ထိခိုက်ဒဏ်ရာ ရရှိခဲ့ပါတယ်။
