လွေးလာဝ်ဇာရ်၊ ဖေဖော်ဝါရီ ၂ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် ဟိုနောင်အုပ်စု ဟိုဆိုင်(နမ့်ဆိုင်)ရွာမှာ လက်လုပ်မိုင်း ပေါက်ကွဲမှုကြောင့် ကလေးငယ် ၂ ဦးသေဆုံးပြီး ၂ ဦး ဒဏ်ရာ ရခဲ့တယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်ဟာ မနေ့ ဖေဖော်ဝါရီ ၁ ရက် မနက် ၁၁ နာရီခွဲခန့်မှာ ဖြစ်ပွားခဲ့ပြီး အဲဒီကလေး ၄ ဦးဟာ ငါးဖမ်းဖို့သွားရင်း နင်းမိတာလို့ ပြောပါတယ်။
ကွတ်ခိုင်ဒေသခံ အမျိုးသားတစ်ဦးက “ကလေးတွေဆိုတော့ လျှောက်လည်တာ။ သွားရင်းနဲ့ မိုင်းနင်းမိတာ။ အဲဒီမိုင်းကလည်း လက်လုပ်မိုင်းဘဲ။ အဲဒီမတိုင်ခင် ကချင်စစ်သားတွေ လာပြောတာ ရှိတယ်တဲ့။ အဲဘက် မသွားဖို့ပေါ့နော်။ အဲဒီမိုင်းက ဘယ်သူဘယ်ဝါဟာတော့ မပြောတတ်ဘူး” လို့ ပြောပါတယ်။
မိုင်းနင်းမိပြီး သေဆုံးသွားတဲ့ ကလေးငယ်ဟာ လွေးအေနွေ (၄ နှစ်)နဲ့ မိုင်းအနိုင်(၅ နှစ်)တို့ဖြစ်ပြီး မိုင်းအညို့လာ (၈ နှစ်)နဲ့ မိုင်းထွန်းအောင် (၉ နှစ်)တို့ကတော့ ဒဏ်ရာ ရခဲ့တယ်လို့ ဆိုပါတယ်။
အဲဒီကလေးတွေ မိုင်းနင်းမိတဲ့နေရာဟာ တိုက်ပွဲ မဖြစ်ပွားဖူးသလို ဘယ်တပ်စခန်းမှမရှိတဲ့အတွက် မိုင်းကို ဘယ်သူ ထောင်ထားလဲဆိုတာကိုတော့ မသိရသေးဘူးလို့ ဆိုပါတယ်။
ပြီးခဲ့တဲ့ ဇန်နဝါရီလအတွင်း ရွှေဖီမြေက ရရှိထားတဲ့စာရင်းအရ မြေမြှုပ်မိုင်း နင်းမိသူ ၅ ဦးအထိ ရှိပါတယ်။
အလားတူ ၁၀၂၇ စစ်ဆင်ရေး ပထမလှိုင်း၊ ဒုတိယလှိုင်းအတွင်းနဲ့ လက်ရှိအချိန်ထိ ရှမ်းမြောက်က အရပ်သားတွေဟာ မကြာခဏ မိုင်းနဲ့ စစ်ကျန်လက်နက်ေကြာင့် ထိခိုက်သေဆုံးနေကြရပါတယ်။
