မိုင်းရူပ၊ ဇန်နဝါရီ ၁၀ ရက်၊ လွိုင်လင်လေး
ကရင်နီပြည် လွိုင်ကော်မြို့နယ် လွိုင်လင်လေးမြို့ အိုင်စန့်ရွာက လသားကလေးအပါအဝင် ၂ ဦးဟာ စစ်ကောင်စီတပ်ရဲ့ လက်နက်ကြီးကြောင့် သေဆုံးခဲ့ရပြီး နောက်ထပ် ၂ ဦးလည်း အပြင်းအထန်ဒဏ်ရာ ရခဲ့ပါတယ်။
မနေ့ ဇန်နဝါရီ ၉ ရက် မနက် ၁၁ နာရီဝန်းကျင်မှာ လွိုင်လင်လေးအခြေစိုက် စစ်ကောင်စီရဲ့ ခြေမြန်တပ်ရင်း (ခမရ ၅၃၀)က ပစ်ခတ်တဲ့ လက်နက်ကြီးကြောင့် ၁၂ နှစ်အရွယ်ရှိ ကလေးငယ် ၂ ဦး သေဆုံးပြီး ၅ လသားကလေးတစ်ဦးအပါအဝင် အသက် ၃၀ ကျော်အရွယ် အမျိုးသမီးတစ်ဦး ထိခိုက်ဒဏ်ရာ ရခဲ့ပါတယ်။
“ကလေး ၂ ယောက် သေဆုံးတယ်။ ၅ လသားအရွယ် ကလေးတစ်ဦး လက်ပြတ်သွားတယ်။ အမျိုးသမီးတစ်ဦး ရင်ဘတ်မှာ ဒဏ်ရာ ရတယ်” လို့ ကရင်နီ အမျိုးသားများ ကာကွယ်ရေးတပ်- KNDF ရဲ့ ဗဟိုနဲ့ သတင်းပြန်ကြားရေးတာဝန်ခံက ရွှေဖီမြေကို ပြောပါတယ်။
စစ်တပ်ဟာ လူထုတွေကို ပစ်မှတ်ထား တိုက်ခိုက်နေတာလို့လည်း သူက ဆက်ပြောပါတယ်။
စစ်တပ်ဘက်ကတော့ အိုင်စန့်ရွာကို လက်နက်ကြီး ပစ်ခတ်တိုက်ခိုက်တာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ဒီဇင်ဘာ ၃၁ ရက်နဲ့ ဇန်နဝါရီ ၁ ရက်မှာလည်း စစ်တပ်ဟာ ဒီးမော့ဆိုအနောက်ခြမ်းရှိ စစ်ရှောင်တွေ နေထိုင်တဲ့ နေရာကို ၂ ရက်ဆက်တိုက် ဗုံးကြဲတိုက်ခိုက်ခဲ့ပြီး အရပ်သား ၁ ဦး ထိခိုက်ဒဏ်ရာ ရခဲ့ပါတယ်။
အလားတူ ဒီဇင်ဘာ ၃၁ ရက်မှာပဲ ကရင်နီပြည် လွိုင်ကော်မြို့နယ် အရှေ့ဘက်ခြမ်းရှိ ဆင်စခန်း စစ်ရှောင်စခန်းကို ဗုံးကြဲတိုက်ခိုက်ခဲ့ရာ သားအမိ ၂ ဦး ပွဲချင်းပြီး သေဆုံးကာ ၃ ဦး ဒဏ်ရာ ရခဲ့ပါတယ်။
တိုးတက်သော ကရင်နီ ပြည်သူ့အင်အားစု- PKPF ရဲ့ စာရင်းအရ ကရင်နီပြည်ထဲ စစ်တပ် အာဏာသိမ်းပြီး ၄ နှစ်နီးပါးအတွင်း သေဆုံးခဲ့ရတဲ့ အရပ်သား ၅၃၆ ဦး ရှိပြီလို့ ပြီးခဲ့တဲ့ ဇန်နဝါရီ ၁ ရက်က ထုတ်ပြန်ချက်အရ သိရပါတယ်။
