မိုင်းရူပ၊ ဧပြီ ၁၀ ရက်၊ စစ်ကိုင်း
စစ်ကိုင်းတိုင်း မြင်းမူမြို့နယ် စံတင်ကင်းကျေးရွာမှာ စစ်ကောင်စီတပ်က ပစ်ခတ်လိုက်တဲ့ လက်နက်ကြီးကြောင့် ကလေး ၂ ဦးသေဆုံးပြီး ၆ ဦးဒဏ်ရာရခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၈ ရက် ည ၇ နာရီခွဲဝန်းကျင်မှာ စံတင်ကင်းကျေးရွာကို စစ်ကောင်စီတပ် လက်နက်ကြီး ၁၁ လုံး ပစ်ခတ်တိုက်ခိုက်ခဲ့ရာ ၂ နှစ် ကလေးငယ် ၂ ဦးသေဆုံးပြီး ၆ ဦးဒဏ်ရာရခဲ့ပါတယ်။
“လက်နက်ကြီးနဲ့ ၁၁ ကြိမ်ထုတာ ၃ လုံးက ရွာခံတွေ ရွာမှာရှိတဲ့အချိန်ဖြစ်နေတာ။ ၂ နှစ်အရွယ်ကလေး ၂ ဦးသေတယ်။ ၆ ယောက်ဒဏ်ရာရတယ်။ ၂ ယောက်က ဒဏ်ရာပြင်းထန်တယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်ကောင်စီတပ်က စံတင်ကင်းကျေးရွာထဲကို လက်နက်ကြီးနဲ့ ပစ်ခတ်တိုက်ခိုက်ပြီးနောက် နောက်နေ့မနက်အစောပိုင်း ၁ နာရီဝန်းကျင်မှာ ရွာထဲကို စစ်ကြောင်းထိုး ဝင်ရောက်လာပြီး နေအိမ်တွေကို မီးရှို့သွားတယ်လို့ သူကဆက်ပြောပါတယ်။
ငလျင်လှုပ်ခတ်မှုကြောင့် စစ်ကိုင်းတိုင်းအပါအဝင် နိုင်ငံတဝန်းမှာ လူပေါင်းထောင်နဲ့ချီသေဆုံးခဲ့ရချိန် စစ်ကောင်စီရဲ့ ဗုံးကြဲတိုက်ခိုက်မှုကြောင့် အရပ်သားတွေ ပြန်လည်သေဆုံးနေရတာ ဖြစ်ပါတယ်။
ဒီရက်ပိုင်းအတွင်း စစ်ကောင်စီတပ်ဟာ နိုင်ငံတဝန်းမှာ လက်နက်ကြီး၊ လေကြောင်းတိုက်ခိုက်မှုဆက်တိုက်လုပ်ဆောင်နေပြီး မနေ့ ဧပြီ ၉ ရက်မှာ စစ်ကိုင်းတိုင်း ဝန်းသိုမြို့နယ် နမ်းခမ်းရွာကို စစ်ကောင်စီက ဂျက်လေယာဉ်နဲ့ ဗုံးကြဲတိုက်ခိုက်ခဲ့ရာ ကလေးငယ်တွေအပါအဝင် သေဆုံးသူ ၂၅ ဦးထက်မနည်းရှိပြီး ဒဏ်ရာရသူ အများအပြားရှိခဲ့ပါတယ်။
ဒါ့အပြင် မနေ့ ဧပြီ ၉ ရက်နဲ့ ဒီနေ့ ဧပြီ ၁၀ ရက်မှာ ချင်းပြည်နယ် တီးတိန်၊ မင်းတပ်၊ မန္တလေးတိုင်း မတ္တရာနဲ့ စစ်ကိုင်းတိုင်း ကောလင်းမြို့နယ်တွေမှာ စစ်ကောင်စီတပ်က လေကြောင်းနဲ့ တိုက်ခိုက်လို့ အရပ်သား ၁၄ ဦးထက်မနည်းသေဆုံးခဲ့ပြီး ဒဏ်ရာရသူအများအပြားရှိခဲ့ပါတယ်။
စစ်ကောင်စီတပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမယ့် တော်လှန်ရေးအင်အားစုတွေထိန်းချုပ်ထားတဲ့ဒေသတွေကို လေကြောင်းနဲ့တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
စစ်ကောင်စီတပ်ဘက်ကတော့ ၎င်းလက်လွတ်ထားရတဲ့ နယ်မြေတွေမှာ လေကြောင်းအသုံးပြုကာ တိုက်ခိုက်ခဲ့တာနဲ့ ပတ်သက်ပြီး တစ်စုံတရာ တုန့်ပြန်ထားတာ မရှိသေးပါဘူး။
