လွေးဇွန်မိုး၊ ဧပြီ ၂၃ ရက်၊ နမ့်ဆန်
လက်ပစ်ဗုံး ပေါက်ကွဲမှုဖြစ်ပြီး တအာင်းဒေသ နမ့်ဆန်မြို့နယ် အရှေ့လုံတောက်ရွာက အသက် ၅ နှစ်အရွယ် လွေးဆိုင်မွန်းခေါ် သီရိရတနာထွန်းနဲ့ ၈ နှစ်အရွယ် ကြယ်စင်အောင်ခေါ် ခွန်ရီတို့ မောင်နှမနှစ်ဦး ဒဏ်ရာ အပြင်းအထန် ရခဲ့ပါတယ်။
ပြီးခဲ့တဲ့ ဧပြီ ၂၀ ရက် နေ့လယ် ၂ နာရီဝန်းကျင်က အရှေ့လုံတောက်နဲ့ မန်လန်းရွာကြားရှိ လက်ဖက်ခြံထဲ မပေါက်ကွဲသေးတဲ့ လက်ပစ်ဗုံး ယူဆော့မိရာကနေ ပေါက်ကွဲခဲ့တာကြောင့် လွေးဆဲင်မွန်းရဲ့ ဝမ်းဗိုက်နဲ့ ခွန်ရီရဲ့ ပါးမှာ ဒဏ်ရာ ရခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
“လက်ပစ်ဗုံးက အလုံးမဟုတ်ဘူး။ နည်းနည်းရှည်တဲ့ဟာလေ။ ကလေးက အဲလက်ပစ်ဗုံး ယူပြီးတော့ အဖုံးဖွင့်ပြီး ကြိုးဆွဲမိတာပေါ့။ ကြိုးဆွဲမိတဲ့အခါကျတော့ အသံမြည်တာပေါ့နော် အသံမြည်တော့ သူက လွှင့်ပစ်လိုက်တာ။ ကလေးကျတော့ မပြေးနိုင်တော့ ထိသွားတာ။ မိန်းကလေးတော့ ဗိုက်ထိတယ်။ ဒဏ်ရာတော့ တော်တော်ပြင်းထန်တယ်။ ဗိုက်တွေကော အစာအိမ်တွေကော အကုန်ထိတယ်။ ယောက်ျားလေးတော့ ပါးထိတယ်။ ပါးထိတော့ သူက အံကပ်ပါ ထိသွားတာ။ အံကပ်ကျတော့ စတီး ထည့်ရမှာ။ အနောက်ထိ ပေါက်တယ်”
လက်ရှိမှာတော့ ဒဏ်ရာရတဲ့ လွေးဆဲင်မွန်းနဲ့ ခွန်ရီတို့ကို နမ့်ခမ်း ပြည်သူ့ဆေးရုံမှာ ကုသမှု ခံယူဖို့ ပို့ဆောင်ထားပြီး ငွေကြေးအကူအညီ လိုအပ်နေတယ်လို့ ဆိုပါတယ်။
အဲဒီလက်ဖက်ခြံအနီးကို တအာင်းတပ်မတော်ရဲ့ တပ်သားတွေ မကြာခဏ ဖြတ်သန်းသွားလာတာ ရှိသလို လွန်ခဲ့တဲ့ ၂၀၂၂ ခုနှစ်ကလည်း မန်လန်းရွာအနီးဝန်းကျင်မှာ စစ်ကောင်စီတပ်နဲ့ TNLA တိုက်ပွဲ ဖြစ်ပွားခဲ့ဖူးခဲ့ဖူးတယ်လို့ ဒေသခံတွေက ပြောပါတယ်။
