ရွှေဖီမြေ၊ ဇန်နဝါရီ ၁၄ ရက်၊ မုံရွာ
စစ်ကိုင်းတိုင်း မုံရွာမြို့မှာ အခြေစိုက်တဲ့ အနောက်မြောက်တိုင်း စစ်ဌာနချုပ်ကနေ အရာတော်မြို့ဘက် စစ်အင်အားဖြည့်ဖို့ သွားတဲ့ စစ်ယာဥ်တန်းနဲ့ စစ်ကြောင်းကို မုံရွာ-အရာတော် လမ်းပိုင်းတစ်နေရာမှာ ကြားဖြတ်တိုက်ခိုက်ရာ စစ်သား ၁၆ ဦး သေဆုံးခဲ့ပါတယ်။
ပြီးခဲ့တဲ့ ဇန်နဝါရီ ၉ ရက် မနက် ၁၀ နာရီခွဲကနေ နေ့လယ် ၁၂ နာရီအထိ ကြားဖြတ်တိုက်ခိုက်ရာ စစ်သုံ့ပန်း ၇ ဦးကို အရှင်ဖမ်းမိပြီး ကား ၅ စီးနဲ့ လက်နက်ခဲယမ်းတချို့လည်း သိမ်းဆည်းရမိခဲ့တယ်လို့ မုံရွာခရိုင် အမှတ်(၂၄) တပ်ရင်းက ဒီနေ့ ဇန်နဝါရီ ၁၄ ရက်မှာ ထုတ်ပြန်လာပါတယ်။
၁၂၂ မမ ဟောင်ဝှစ်ဇာ အမြောက်ဆံ ၁၅ လုံး၊ RPG ဗုံးသီး အလုံး ၂၀၊ 5.56 ကျည် ၄ ထောင်တောင့်၊ 7.62 ကျည် ၅ ထောင်တောင့်၊ ဒရုန်းဗုံးသီး ၂၀ လုံး၊ ၆၀ မမ ၂၇ လုံး၊ မိုင်းမျိုးစုံ ၃၀၊ နင်းမိုင်း ၄၅ လုံး၊ Jammer စက်ကြီး ၃ လုံး၊ စက်အသေး ၂ လုံး၊ G3 ၂ လက်၊ MA4 ၁ လက်၊ Uzi ၁ လက်၊ ၄၀ မမ ၃ လုံး၊ ကျောပိုးအိတ် ၅ လုံး၊ Uniform ၂ စုံနဲ့အတူ အခြားဆက်စပ်ခဲယမ်းလည်း သိမ်းဆည်းရမိတယ်လို့ ထုတ်ပြန်ချက်မှာ ဖော်ပြထားပါတယ်။
တိုက်ပွဲအတွင်း မုံရွာမြို့နယ် ကျောက်စစ်ပုံ အမြှောက်တပ်က ဟောင်ဝှစ်ဇာ လက်နက်ကြီး ၅ လုံး ပစ်ကူပေးခဲ့ပြီး မြေပြင်စစ်ကြောင်းကနေလည်း စစ်ေကြာင်းထိုး တိုက်ခိုက်ခဲ့တာကြောင့် မုံရွာခရိုင်အမှတ်(၂၄) တပ်ရင်းမှ ရဲဘော်တစ်ဦး ကျဆုံးခဲ့ကြောင်း ဖော်ပြထားပါတယ်။
တိုက်ပွဲအတွင်း ကျဆုံးသွားတဲ့ ရဲဘော် အုတ်ကြိုးခေါ် သန်းထိုက်ဦးကို မုံရွာခရိုင် အမှတ်(၂၄) တပ်ရင်း Monywa Ranger Group/Truth Army က ဖက်ဒရယ်သူရဲကောင်းအဖြစ် မှတ်တမ်းတင် ဂုဏ်ပြု ပေးသွားမှာဖြစ်ပြီး ကျန်ရစ်တဲ့ မိသားစုနဲ့အတူ ထပ်တူဝမ်းနည်းကြောင်း ဒီနေ့မှာ ထုတ်ပြန်ထားပါတယ်။
မုံရွာခရိုင် အမှတ်(၂၄) တပ်ရင်းနဲ့အတူ ဗမာလွတ်မြောက်ရေး ဒီမိုကရက်တစ်တပ်ဦး- BLDF၊ မုံရွာခရိုင် ဗျူဟာ ၆၆ စစ်ကြောင်း (မုံရွာခရိုင် အမှတ် ၁၉၊ ၂၆၊ ၂၁)တပ်ရင်း၊ မုံရွာခရိုင် တပ်ရင်း (၂၀၊ ၂၂၊ ၁၈၊ ၂၇)၊ အရာတော်မြို့နယ် ပကဖ၊ အရာတော်မြို့နယ် ပကဖ တိုက်နယ် အမှတ် (၁၀၊ ၁၁)၊ မုံရွာမြို့နယ် ပကဖ တိုက်နယ်အမှတ် ၂၊ အရာတော်မြို့နယ် ပလဖ၊ Golden Eagle Force၊ Venomous Revolution Force၊ Special Revolution Force အဖွဲ့နဲ့အတူ ပူးပေါင်းတိုက်ခိုက်ခဲ့တာပဲ ဖြစ်ပါတယ်။
