ပို့လဘား၊ မတ်လ ၁၅ ရက်၊ မိုးဗြဲ
ရှမ်းတောင်နဲ့ ကရင်နီနယ်စပ် ရှမ်းတောင် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်နဲ့ တော်လှန်ရေးတပ်ဖွဲ့တို့ ဖြစ်ပွားတဲ့ တိုက်ပွဲအတွင်း စစ်တပ်ဘက်က ၁၅ ဦး သေဆုံးခဲ့ပြီး လက်နက်ခဲယမ်းလည်း သိမ်းဆည်းရမိခဲ့တယ်လို့ ရှမ်းတောင်စစ်ဒေသခွဲ ဗျူဟာ(၁)ရဲ့ သတင်းပြန်ကြားရေး တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ မတ်လ ၁၄ ရက် တိုက်ပွဲအတွင်း စစ်ကောင်စီတပ်သား ၁၅ ဦး သေဆုံးခဲ့သလို လက်နက် ၉ လက်နဲ့ ဆက်စပ်ပစ္စည်းလည်း သိမ်းဆည်းရမိခဲ့တယ်လို့ ပြောပါတယ်။
ရှမ်းတောင်စစ်ဒေသခွဲ ဗျူဟာ(၁)ရဲ့ ပြန်ကြားရေးတာဝန်ရှိသူတစ်ဦးက “မနေ့ကတော့ တိုက်ပွဲဖြစ်တယ်။ စစ်ကောင်စီဘက်က အထိအခိုက် ရှိတာပေါ့။ သူ(စစ်ကောင်စီ)တို့ ဆုတ်ခါနီး အဆိပ်ငွေ့ဗုံး သုံးတာတွေ ရှိတယ်။ အခုလက်ရှိ တိုက်ပွဲကတော့ ငြိမ်နေတယ်” လို့ ပြောပါတယ်။
တိုက်ပွဲအတွင်း ကရင်နီအမျိုးသားများ ကာကွယ်ရေးတပ်- KNDF ရဲ့ တပ်ရင်း ၃ ရဲဘော်တစ်ဦးလည်း ကျဆုံးခဲ့တယ်လို့ တပ်ရင်း ၃ က ဒီနေ့ မတ်လ ၁၅ ရက်မှာ ထုတ်ပြန်ထားပါတယ်။
စစ်တပ်က မိုးဗြဲမြို့အတွင်း ဓာတ်ငွေ့ဗုံးနဲ့ မီးလောင်ဗုံး အသုံးပြုတိုက်ခိုက်ခဲ့တာကြောင့် မတ်လအတွင်း ဒေသခံနေအိမ် ၁၅ လုံးကျော် မီးလောင်ပျက်စီးခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
ပြီးခဲ့တဲ့ မတ်လ ၁၃ ရက်မှာ စစ်တပ်က ဒရုန်းနဲ့ လက်နက်ကြီး အသုံးပြုပြီး ထိုးစစ်ဆင် တိုက်ခိုက်ခဲ့တာကြောင့် တော်လှန်ရေးတပ်ဖွဲ့က ရှေ့တန်းနေရာတချို့ကနေ ဆုတ်ခွာပေးခဲ့ရတယ်လို့ ဆိုပါတယ်။
