မိုင်းရူပ၊ မတ်လ ၂၈ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် ၇ မိုင်ကျေးရွာ တိုက်ပွဲမှာ မိုးကုတ်ဗျူဟာ တပ်ဖွဲ့ဝင် ၁၂ ဦး ကျဆုံးခဲ့တယ်လို့ မိုးကုတ်ဗျူဟာက ဒီနေ့ မတ်လ ၂၈ ရက်မှာ သတင်းထုတ်ပြန်လာပါတယ်။
ပြီးခဲ့တဲ့ မတ်လ ၈ ရက်က ၇ မိုင် တိုက်ပွဲမှာ မိုးကုတ်ဗျူဟာရဲ့ တပ်ဖွဲ့ဝင်တွေဖြစ်တဲ့ ရဲဘော် နေလင်း၊ ငဇော်၊ ပေတူး၊ ရွှေငါး၊ ဆလိုဆိုင်း၊ စတုန်း၊ အောင်ကျော်မိုး၊ သက်အောင်၊ ဟိန်းထက်အောင်၊ ဂူးလေး၊ ခိခိနဲ့ ဟိန်းမင်းဇော်တို့ဟာ စစ်ကောင်စီတပ်ကို တိုက်ခိုက်ရင်း ကျဆုံးခဲ့တာ ဖြစ်ပါတယ်။
မတ်လ ၅ ရက်ကစပြီး မိုးကုတ်ဗျူဟာနဲ့ ပူးပေါင်းတပ်ဖွဲ့ တည်ရှိရာကို စစ်တပ်က ထိုးစစ်ဆင် တိုက်ခိုက်နေပြီး နှစ်ဖက်အထိအခိုက် များတယ်လို့ ၇ မိုင် တိုက်ပွဲမှာ ပါဝင်တိုက်ခိုက်နေတဲ့ တော်လှန်ရေးတပ်ဖွဲ့ဝင်တစ်ဦးက ရွှေဖီမြေကို ပြောပါတယ်။
“၅ ရက်နေ့ကတည်းက စစ်ကောင်စီတွေ ထိုးနေတာ။ အထိအခိုက် များတယ်။ အဓိက ဒရုန်းပေါ့။ စကစတွေ ဒရုန်း ပိုကောင်းလာတယ်”
ပြီးခဲ့တဲ့ ၂၀၂၄ ခုနှစ် ဇူလိုင်လကတည်းက ၇ မိုင်ကျေးရွာမှာ စစ်တပ်နဲ့ တော်လှန်ရေး အင်အားစုတွေအကြား တိုက်ပွဲ ဖြစ်ပွားနေတာ ဖြစ်ပါတယ်။
၇ မိုင် တိုက်ပွဲမှာ တအာင်းတပ်မတော်- TNLA၊ မိုးကုတ်ဗျူဟာနဲ့ မန္တလေး PDF ပူးပေါင်းတပ်ဖွဲ့က စစ်တပ်ကို တိုက်ခိုက်နေတာပဲ ဖြစ်ပါတယ်။
ရှမ်းမြောက် မိုးမိတ်နဲ့ မန္တလေးတိုင်း မိုးကုတ်မြို့ကို တအာင်းတပ်မတော် သိမ်းပိုက်ပြီးနောက် မိုးမိတ်၊ မိုးကုတ်ကနေ ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေဟာ ၇ မိုင်ရှိ စစ်တပ်နဲ့ သွားရောက် ပူးပေါင်းခဲ့ပါတယ်။
သပိတ်ကျင်းမြို့ကို ပြီးခဲ့တဲ့ ၂ဝ၂၄ ဩဂုတ် ၃၀ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီရဲ့ ၇ မိုင်တပ်စခန်း၊ ကျောက်ကြီးတပ်စခန်းနဲ့ တန်းမြင့်လေ့ကျင့်ရေးကျောင်း အမှတ် ၁၃ တပ် ကျန်ရှိနေတာ ဖြစ်ပါတယ်။
