အိုက်ပွီး၊ ဖေဖော်ဝါရီ ၁ ရက်၊ ကလေး
စစ်ကိုင်းတိုင်း ကလေးမြို့နယ် ကုက္ကုလ်ရွာမှာ လေကြောင်း ဗုံးကြဲခံရမှုကြောင့် စစ်ဘေးရှောင်ကလေးငယ် ၄ ဦးအပါအဝင် ၁၁ ဦး သေဆုံးခဲ့ပြီး ၃၀ ဦးထက်မနည်း ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
စစ်တပ်က စစ်ဘေးရှောင်တွေ နေထိုင်တဲ့ ကုက္ကုလ်ရွာ စာသင်ကျောင်းကို မနေ့ ဇန်နဝါရီ ၃၁ ရက် ညနေ ၅ နာရီခွဲမှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သားတွေ ထိခိုက်သေဆုံးခဲ့တာ ဖြစ်ပါတယ်။
“အခု လေကြောင်း ဗုံးကြဲခံရတဲ့ စာသင်ကျောင်းဟာ အရပ်သားတွေ စစ်ဘေးရှောင်တွေနေတဲ့နေရာပါ။ သေဆုံးတဲ့ သူတွေထဲဲမှာ ကလေးတွေ ပါတယ်။ အလောင်းတွေက အကုန်မရနိုင်သေးဘူး။ အလောင်းတွေကလည်း ခြေပြတ်၊ လက်ပြတ်၊ ခေါင်းပြတ်တွေနဲ့ပါ” လို့ ကလေးမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးသွားသူထဲ ကလေး ၄ ဦးနဲ့ အမျိုးသမီး ၇ ဦးလို့ သိရပြီး အလောင်းတွေကိုတော့ ဒီနေ့မနက်ပိုင်းထိ အကုန်မရနိုင်သေးဘဲ ရှာဖွေနေဆဲလို့ သိရပါတယ်။
ကုက္ကုလ်ရွာမှာ တိုက်ပွဲမရှိပဲ စစ်တပ်က စစ်ဘေးရှောင်တွေ နေထိုင်တဲ့ စာသင်ကျောင်းကို ရည်ရွယ်ချက်ရှိရှိ လေကြောင်းကနေ တိုက်ခိုက်ခဲ့တာလို့ ဒေသခံတွေက ပြောပါတယ်။
ဒါ့အပြင် ကလေးမြို့နယ် တင်သားရွာက အရပ်ဘက် ကျေးလက်ဆေးခန်းကိုလည်း စစ်တပ်က မနေ့ညနေ ၅ နာရီခန့်မှာ လေကြောင်း တိုက်ခိုက်မှု ပြုလုပ်ခဲ့တယ်လို့ သိရပါတယ်။
“လူသေဆုံးမှုက မရှိဘူးပေါ့နော်။ ကျနော်တို့ အချိန်မှီ ဗုံးခိုကျင်းထဲ ပြေးပုန်းလို့လေ။ ကြီးကြီးမားမား ထိခိုက်မှု မရှိဘူး။ ဒဏ်ရာရတဲ့ သူတချို့တော့ ရှိပါတယ်” လို့ ကလေးမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
စစ်တပ်ဟာ ဒီနေ့မနက်အထိ လေကြောင်း တိုက်ခိုက်ခဲ့တဲ့ နေရာတွေကို လေကြောင်းပျံသန်းမှု ရှိနေတာကြောင့် အနီးအနားကျေးရွာက ဒေသခံက ဘေးလွတ်ရာ ထွက်ပြေးတိမ်းရှောင်နေကြတယ်လို့ သိရပါတယ်။
