ရဲမာန်၊ အောက်တိုဘာ ၁၅ ရက်၊ မြောင်
စစ်ကိုင်းတိုင်း မြောင်မြို့နယ် ဇရပ်ကုန်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၁၁ ဦး ထိခိုက်ဒဏ်ရာရရှိခဲ့တယ်လို့ မြောင်မြို့နယ်(T.G.R) ပြည်သူ့ကာကွယ်ရေးတပ်မှ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒီနေ့ အောက်တိုဘာလ ၁၅ ရက် မနက် ၇ နာရီ ၄၅ မိနစ်မှာ ဂျက်ဖိုက်တာနဲ့ ပေါင် ၂၅၀ ဗုံးတစ်လုံး၊ ရော့ကဒ် ၆ လုံး ကြဲချတိုက်ခိုက်ခဲ့တာဖြစ်တယ်လို့ ၎င်းက ဆိုပါတယ်။
“ထိခိုက်ဒဏ်ရာရတဲ့ အရပ်သား ၁၁ ယောက်ထဲမှာ ကျောင်းသားတစ်ယောက်ပါတယ်။ အရင်ဗုံးကြဲတုန်းက ခြေထောက်ထိပြီး ဖျက်ထားရသူက လက်နဲ့ ဗိုက် ထိသွားတယ်။ ဒါမဲ့ မစိုးရိမ်ရပါဘူး။ ခုချိန်ထိတော့ အသေအပျောက်မရှိသေးဘူး” လို့ ၎င်းက ဆိုပါတယ်။
၎င်းဗုံးကြဲတိုက်ခိုက်မှုကြောင့် အမျိုးသား ၈ ဦးနဲ့ အမျိုးသမီး ၃ ဦးတို့ ထိခိုက်ဒဏ်ရာ ရရှိခဲ့တဲ့အပြင် ဘုန်းကြီးကျောင်းရှိ အုတ်တံတိုင်းတွေလည်း ပျက်စီးခဲ့တယ်လို့ ၎င်းက ဆက်ပြောပါတယ်။
“ခုဖြစ်စဉ်မှာလည်း ပြည်သူတွေအနေနဲ့ လေယာဉ်လာတာလည်း သိတယ်။ အရင်လို မဖြစ်လောက်ဘူးထင်ပီး ပေါ့ဆနေကျတယ်။ နောက်နောင်သတိလေးနဲ့နေပြီး ဂရုစိုက်ဖို့ ပြောချင်ပါတယ်”
ဇရပ်ကုန်းကျေးရွာကို ပြီးခဲ့တဲ့ ၂၀၂၄ ခုနှစ် အောက်တိုဘာ ၂၃ ရက် ညနေပိုင်းမှာလည်း စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၆ ဦး သေဆုံးခဲ့ပြီး ၁၀ ဦး ဒဏ်ရာရရှိခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
