လွေးလာဝ်ဇာရ်၊ ဇန်နဝါရီ ၃၀ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ် ဇီးကုန်းမြို့နဲ့အနီးနားရွာကနေ စစ်မှုထမ်းဖို့အတွက် ဒေသခံ ၁၀၀ နီးပါးကို စစ်ကောင်စီတပ်က ဖမ်းဆီးခေါ်ဆောင်သွားတယ်လို့ ကျွန်းလှ တက်ကြွလှုပ်ရှားသူများအဖွဲ့က ထုတ်ပြန်ထားပါတယ်။
မနေ့ ဇန်နဝါရီ ၂၉ ရက် မနက် ၉ နာရီမှာ ကန့်ဘလူမြို့နယ် ရဲမှူးအပါအဝင် ယူနီဖောင်းအပြည့်အစုံ ဝတ်ထားသူက ကား ၃ စီးနဲ့ ဝင်ရောက်လာပြီး ဒေသခံလူငယ်တွေကို အတင်းအဓမ္မ လိုက်လံ ဖမ်းဆီးခဲ့တယ်လို့ ဆိုပါတယ်။
အလားတူ မနက် ၁၀ နာရီမှာလည်း နဂါးပေါ်နဲ့ ပုပ္ပါးရွာထဲ ဝင်ရောက်လာပြီး ၎င်းတို့ဖမ်းဆီးထားတဲ့ ဒေသခံ ၁၀၀ နီးပါးကို ကား ၄ စီးနဲ့ ဇီးကုန်းသကြားစက်ရုံဘက် ခေါ်ဆောင်သွားကြောင်း သိရပါတယ်။
ကျွန်းလှ တက်ကြွလှုပ်ရှားသူများအဖွဲ့ရဲ့ တာဝန်ရှိသူတစ်ဦးက “အမျိုးသမီး ပါမပါတော့ မသိရသေးဘူး။ ပြန်လွှတ်လာတာလည်း တစ်ယောက်မှ မကြားရသေးဘူး” လို့ ပြောပါတယ်။
ပြီးခဲ့တဲ့ ဇန်နဝါရီ ၁၅ ရက်ကစပြီး ကန့်ဘလူမြို့နယ်အတွင်း ပျူစောထီးခေါင်းဆောင်ဝါသဝနဲ့ မြို့ပေါ်ရပ်ကွက်က အုပ်ချုပ်ရေးမှူး ဦးဆောင်ပြီး ကျေးရွာတချို့နဲ့ မြို့ပေါ်ရပ်ကွက်မှ လူငယ်တွေ စစ်မှုထမ်းဖို့အတွက် ပေါ်တာဆွဲ ဖမ်းဆီးမှု ပိုများလာတယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဇန်နဝါရီ ၂၁ ရက်မှာ ကန့်ဘလူမြို့အမှတ် ၂ ရပ်ကွက်ကနေ စစ်တပ် ဖမ်းဆီးသွားတဲ့ လူငယ် ၇ ဦးကိုလည်း ဒီနေ့အထိ ပြန်လွှတ်ပေးတာ မရှိသေးဘူးလို့ ၎င်းက ဆိုပါတယ်။
စစ်တပ် အာဏာသိမ်းပြီးနောက် ၄ နှစ်နီးပါးကာလအတွင်း ဒီမိုကရေစီအရေး တက်ကြွလှုပ်ရှားသူနဲ့ အရပ်သား (၂၈,၄၀၅)ဦးကို ဖမ်းဆီးထားပြီး သေဆုံးသူ (၆,၂၂၄)ဦးအထိ ရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း- AAPP က မနေ့ ဇန်နဝါရီ ၂၉ ရက်မှာ ထုတ်ပြန်ထားပါတယ်။
