မိုင်းရူပ၊ ဇန်နဝါရီ ၁၇ ရက်၊ အောင်ပန်း
ရှမ်းတောင် ကလောမြို့နယ် အောင်ပန်းမြို့ရဲစခန်းကနေ အချုပ်ခန်း ဖောက်ပြီး ထွက်ပြေးသွားတဲ့ အချုပ်သား ၁၀ ဦးကို ပြန်ဖမ်းမိပြီလို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၉ ရက်မှာ အချုပ်သား ၁၀ ဦးက သေနတ် ယူကာ ထွက်ပြေးသွားတာဖြစ်ပြီး ထွက်ပြေးသွားသူတွေကို ရဲတပ်ဖွဲ့ဝင်က လိုက်လံ ရှာဖွေရာ မနေ့ ဇန်နဝါရီ ၁၆ ရက်မှာ ထွက်ပြေးခဲ့သူ အားလုံးကို ပြန်ဖမ်းမိခဲ့တာ ဖြစ်ပါတယ်။
“အကုန်လုံးတော့ ပြန်ရပြီလို့ ပြောတယ်။ မနေ့မှာ နောက်ဆုံးတစ်ယောက် မိတာ။ ယူသွားတဲ့ သေနတ်လည်း ပြန်ရပြီလို့ သိရတယ်” လို့ ဖြစ်စဥ်ကိုသိရှိတဲ့ အောင်ပန်းဒေသခံ အမျိုးသားတစ်ဦးက ရွှေဖီမြေကို ပြောပါတယ်။
အောင်ပန်း ရဲစခန်းကနေ ထွက်ပြေးသွားသူတွေဟာ ခိုးမှုနဲ့ လူသတ်မှု ကျူးလွန်ထားသူဖြစ်ပြီး အားလုံးက အမျိုးသားတွေ ဖြစ်တယ်လို့ သိရပါတယ်။
အောင်ပန်း ရဲစခန်းမှာ အခုလို အချုပ်သားတွေ ထွက်ပြေးတဲ့ဖြစ်စဥ်ဟာ ပထမဆုံးအကြိမ် ဖြစ်တယ်လို့လည်း ဆိုပါတယ်။
စစ်တပ်ဘက်ကတော့ အောင်ပန်းမှာ ထွက်ပြေးသွားတဲ့ အချုပ်သားတွေကို ပြန်လည် ဖမ်းဆီးရမိတာနဲ့ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
