ယာရူစိင်၊ စက်တင်ဘာ ၂၉ ရက်၊ ဝိုင်းမော်
ကချင်ပြည်နယ် ဝိုင်းမော်မြို့နယ် ဆဒုံးမြို့ကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ကလေးငယ် ၂ ဦးအပါအဝင် ဒေသခံ ၁၀ ဦးသေဆုံးခဲ့တယ်လို့ ဆဒုံးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ စက်တင်ဘာ ၂၉ ရက် နေ့လယ် ၃ နာရီဝန်းကျင်မှာ တိုက်ပွဲဖြစ်ပွါးခြင်းမရှိတဲ့ ဆဒုံးမြို့ကို စစ်ကောင်စီတပ်က ဗုံး ၂ လုံးကြဲချတိုက်ခိုက်ခဲ့တာကြောင့် သေဆုံးသူတွေအပြင် ဒဏ်ရာရသူ ၁၅ ဦးရှိတယ်လို့ ဆိုပါတယ်။
“ဗုံး ၂ လုံးကြဲသွားတာပါ။ ကလေးငယ်တွေလည်း ပါဝင်ပါတယ်။ လက်ရှိအချိန်ထိတော့ ဒဏ်ရာရသူ ၁၅ ဦးရှိပါတယ်။ သေဆုံးသူထပ်တိုးနိုင်ပါတယ်”လို့ ဆဒုံးမြို့ခံ အမျိုးသားတစ်ဦးက ပြောပါတယ်။
ဆဒုံးမြို့မှာ တိုက်ပွဲဖြစ်ပွါးခြင်းမရှိတဲ့ မြို့ဖြစ်ပြီး စစ်ကောင်စီတပ်ဟာ ဒေသခံလူထုတွေကိုသာ ပစ်မှတ်ထားတဲ့ လေကြောင်းတိုက်ခိုက်မှု ပြုလုပ်သွားတာ ဖြစ်တယ်လို့ ဆိုပါတယ်။
လက်ရှိမှာတော့ ဖားကန့်မှာ စစ်ကောင်စီတပ်နဲ့KIAတပ်တို့အကြား စစ်ရေးတင်းမာနေဆဲ ဖြစ်ပြီး စစ်ကောင်စီတပ်ဘက်က လက်နက်ကြီးတွေအပါ လေကြောင်းကနေလည်း မကြာခဏဆိုသလို ပစ်ခတ်ဗုံးကြဲတိုက်ခိုက်လေ့ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
