လွေးလာဝ်ဇာရ်၊ မတ်လ ၂ ရက်၊ မိုင်းရယ်
ရှမ်းမြောက် မိုင်းရယ်မြို့နယ် မိုင်းဟဒေသက ကျားဖြန့်ရုံတစ်ခုကို ဝင်ရောက်စီးနင်းချိန်မှာ ပစ်ခတ်မှုဖြစ်ပြီး ကျားဖြန့်လုပ်ကိုင်သူ ၁၀ ဦး သေဆုံးခဲ့တယ်လို့ ဖြစ်စဉ်သိရှိသူ မိုင်းဟဒေသခံတစ်ဦးက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ ဖေဖော်ဝါရီ ပထမအပတ်မှာ ဖြစ်ပွားခဲ့ပြီး ပစ်ခတ်ခံရသူတွေထဲ တရုတ်လူမျိုး ၃ ဦး၊ မိုင်းဟဒေသခံ ၃ ဦးနဲ့ လုံခြုံရေး လုပ်ပေးနေသူ မိုင်းဟ ပြည်သူ့စစ် ၄ ဦး သေဆုံးခဲ့တယ်လို့ ဆိုပါတယ်။
ဖြစ်စဉ်သိရှိသူ မိုင်းဟဒေသခံတစ်ဦးက “ဒီမိုင်းဟမှာ တိုင်းမှူးက ကျားဖြန့် ဝင်ဖမ်းတော့ ပစ်သတ်တာ။ ကျားဖြန်က လူ ၁၀ ယောက် သေတယ်။ ကျားဖြန့်ဝင်ဖမ်းတာ တိုက်ပွဲကျနေတာဘဲ။ ဒါပေမဲ့ သူတို့က အကုန်ဖုံးဖိတာ သတင်းပေးမထွက်ဘူး။ ဒဏ်ရာရတဲ့သူက ရှိမရှိတော့ မသိရဘူး” လို့ ပြောပါတယ်။
မိုင်းရယ်မှာ ကျားဖြန်တွေကို ဝင်ဖမ်းတယ်ဆိုတဲ့သတင်းက ဟန်ပြအနေနဲ့ ဝင်ဖမ်းတယ်လို့သာ မြင်မိကြောင်း နောက်ထပ် မိုင်းရယ်ဒေသခံ အမျိူသမီးတစ်ဦးက ပြောပါတယ်။
“ကျမတို့ တွေ့ရသလောက်ဆို တစ်ကယ်မဖမ်းပါဘူး။ ဟန်ပြလောက်ဘဲ နည်းနည်းဘဲ ဖမ်းပြတာပါ။ ကျားဖြန် ရှိတဲ့နေရာနဲ့ သူတို့နေရာ ဝေးမှမဝေးဘဲ။ လူထောင်ကျော်ရှိတဲ့နေရာတွေမှ အများကြီးဘဲ။ တစ်ကယ့် လူအများကြီးရှိတဲ့နေရာကို မဝင်ဖမ်းဘူး။ နယ်မြေက အဲ့လောက်မှ မကျယ်တာကိုး ဖမ်းချင်လွယ်လွယ်လေးဘဲ”
တန့်ယန်း၊ မိုင်းရယ်၊ ဝမ်ဟိုင်း၊ ဟိုက်ပု ရေတံခွန် စတဲ့နေရာတွေမှာ ကျားဖြန်ရုံ အများဆုံးရှိတဲ့နေရာ ဖြစ်တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ၅ ရက်ကနေ ၉ ရက်အထိ မိုင်းရယ်က ကျားဖြန့်လုပ်ငန်းမှာ လုံခြုံရေး ဆောင်ရွက်ပေးနေသူ ၅ ဦး၊ တရုတ်နိုင်ငံသား ၅၀ ဦး၊ ဗီယက်နမ်နိုင်ငံသား ၁၈ ဦး၊ မြန်မာနိုင်ငံသား ၃၄ ဦး စုစုပေါင်း ၁၀၂ ဦးကို ဖမ်းဆီးရမိခဲ့တယ်လို့ စစ်ကောင်စီက ပြီးခဲ့တဲ့ ဖေဖော်ဝါရီ ၁၀ ရက်မှာ သတင်းထုတ်ပြန်ထားပါတယ်။
