ပျားကြီး၊ ဧပြီ ၁၀၊ မန္တလေး
ငလျင်ဒဏ်ကို ပြင်းပြင်းထန်ထန်ခံနေရတဲ့ မတ္တရာမြို့နယ် အနောက်ခြမ်းကို စစ်ကောင်စီကလေကြောင်းကနေ ဗုံးကြဲတိုက်ခိုက်မှုပြုလုပ်ခဲ့တာကြောင့် အမျိုးသမီး ၁ ဦး အသက်ဆုံးရှုံးခဲ့ရတယ်လို့ ဒေသခံတွေကပြောပါတယ်။
ဒီကနေ့ မနက် ၁၁ နာရီဝန်းကျင်က ဧရာဝတီမြစ်အရှေ့ဖက်ကမ်း၊ မတ္တရာမြို့နယ် အနောက်မြောက်အရပ်ကကျေးရွာတစ်ရွာကို လေကြောင်းတိုက်ခိုက်မှုပြုလုပ်ခဲ့တာဖြစ်ပါတယ်။
“ငလျင်ဒဏ်ကိုအလူးအလဲခံနေရတာ။ အကူအညီတွေလည်းလာလို့ မရအောင်လုပ်ထားတယ်။ ဒီကြားထဲအခုလိုလေယာဥ်နဲ့ဗုံးလာကြဲတာ။ အတော်ယုတ်ညံ့တဲ့စစ်တပ်ပဲဗျ”လို့ ဒေသခံအမျိုးသားတစ်ဦးကပြောပါတယ်။
ဒီနေ့ ဧပြီလ ၁၀ရက်နေ့ နေ့လည် ၂နာရီတုန်းကလည်း ကောလင်းမြို့နယ် အင်ပင်လှရွာကို ဗုံးကြဲတိုက်ခိုက်ခဲ့လို့ အမျိုးသမီးငယ်တစ်ဦး သေဆုံးသွားခဲ့ပါတယ်။
စစ်ကောင်စီတပ်ဟာ ဒီ ၂ရက်အတွင်း လေကြောင်းတိုက်ခိုက်မှု ဆက်တိုက်လုပ်ဆောင်နေပြီး ချင်းပြည်နယ်၊စစ်ကိုင်းတိုင်း၊မန္တလေးတိုင်းနဲ့ ရှမ်းမြောက်ကို အဓိက တိုက်ခိုက်နေတာဖြစ်ပြီး အဲတိုက်ခိုက်မှုကြောင့် ၂ရက်အတွင်း အရပ်သား ၄၀ထက်မနည်းသေဆုံးသွားခဲ့ပါတယ်။
