ယာရူစိင်၊ ဇူလိုင် ၃၁ ရက်၊ ဖားကန့်
ကချင်ပြည် ဖားကန့်မြို့နယ် မှော်စီစာရွာမှာ စစ်ကောင်စီတပ်က ပစ်လိုက်တဲ့ လက်နက်ကြီးကြောင့် ဒေသခံ အမျိုးသမီး ၁ ဦးသေဆုံးပြီး ၄ ဦးဒဏ်ရာရရှိခဲ့တယ်လို့ ဒေသခံတစ်ဦးက ရွှေဖီမြေကို ပြောပါတယ်။
မနေ့ ဇူလိုင် ၃၀ ရက် ည ၈ နာရီခွဲဝန်းကျင်မှာ စစ်ကောင်စီတပ်က ရမ်းသမ်းပစ်လိုက်တဲ့ လက်နက်ကြီးကြောင့် မှော်စီစာရွာရှိ နေအိမ် တစ်အိမ်ပေါ် ကျရောက်ပေါက်ကွဲခဲ့တာလို့ ဆိုပါတယ်။
“သေဆုံးသူနဲ့ ဒဏ်ရာရတဲ့သူတွေထဲက မိသားစုဝင် ၃ ဦးပါတယ်။ အမေဖြစ်သူက သေဆုံးတယ်။ သူ့သားနဲ့ သမီးက အရေးပေါ် ဆေးရုံတင်ရတယ်။ သားဖြစ်သူက မနေ့က သွေးထွက်များလို့ ဒီနေ့တောင် သွေးရဖို့ အကူအညီတောင်းနေရတယ်။ ကျန်တဲ့ ဒဏ်ရာရတဲ့ ၂ ဦးက ဘေးအိမ်ကပေါ့” လို့ ဒေသခံတစ်ဦးက ပြောပါတယ်။
စစ်ကောင်စီတပ် ပစ်လိုက်တဲ့ လက်နက်ကြီးကြောင့် အသက် ၃၇ နှစ်အရွယ် ဒေါ်ထိုက်ထိုက်ဝင်း သေဆုံးခဲ့ရတာ ဖြစ်ပါတယ်။
ဒဏ်ရာရသူတွေတော့ အသက် (၁၅) နှစ် အရွယ် အမျိုးသမီး ၁ ဦး၊ အသက် (၁၃) နှစ်အရွယ် အမျိုးသား ၁ ဦး၊ အသက် (၃၀)ကျော်အမျိုးသား ၁ ဦးနဲ့ အသက် (၂၀) ကျော်အရွယ်အမျိုးသား ၁ ဦး ဖြစ်ပါတယ်။
စစ်ကောင်စီတပ်ဟာ လက်နက်ကြီးအပြင် လေကြောင်းကနေလည်း တိုက်ခိုက်ခဲ့လို့ ပြီးခဲ့တဲ့ ဇွန်လ ၁၉ ရက်က စစ်တပ်ရဲ့ ဗုံးကြဲတိုက်ခိုက်မှုကြောင့် ဒေသခံ ၂ ဦးဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
