ရွှေဖီမြေ၊ ဖေဖော်ဝါရီ ၆ ရက်၊ နောင်ချို
တအာင်းတပ်- PSLF/TNLA ထိန်းချုပ်ထားတဲ့ ရှမ်းမြောက် နောင်ချိုမြို့ကို စစ်ကောင်စီတပ်က လေကြောင်းနဲ့ ဗုံးကြဲလို့ ဒေသခံ အမျိုးသားတစ်ဦး ထိမှန်ဒဏ်ရာ ရခဲ့တယ်လို့ တအာင်းတပ်က ဒီနေ့ ဖေဖော်ဝါရီ ၆ ရက် နေ့လယ်မှာ ထုတ်ပြန်လာပါတယ်။
ဒီနေ့ ဖေဖော်ဝါရီ ၆ ရက် မနက် ၁၀ နာရီခွဲဝန်းကျင်မှာ နောင်ချိုမြို့ သပြေတောင်ဘုရားကုန်းကို ဗုံးကြဲချခဲ့တာဖြစ်ပြီး အဲဒီဗုံးကြဲတိုက်ခိုက်မှုကြောင့် ကြံကား မောင်းနှင်လာတဲ့ အသက် ၃၀ နှစ်အရွယ် စိုင်းလှဦး ဆိုသူကို ဗုံးစ ထိမှန်ပြီး ဒဏ်ရာအပြင်းအထန် ရခဲ့တယ်လို့ ဆိုပါတယ်။
လက်ရှိမှာတော့ ဒဏ်ရာရတဲ့ အမျိုးသားကို ဒေသခံတွေက ဆေးကုသပေးဖို့ ခေါ်ဆောင်သွားတယ်လို့ ဖော်ပြထားပါတယ်။
အလားတူ ပြီးခဲ့တဲ့ ဇန်နဝါရီ ၂၂ ရက်ကလည်း နောင်ချိုမြို့ ရဲစခန်းနဲ့ ပါရမီလက်ဖက်ရည်ဆိုင်မှာ စစ်တပ်က ဂျက်ဖိုက်တာနဲ့ ဗုံးကြဲတိုက်ခိုက်မှုကြောင့် ဒေသခံ ၈ ဦး သေဆုံးပြီး ၁ ဦး ထိခိုက်ဒဏ်ရာ ရရှိခဲ့တယ်။
TNLA ထိန်းချုပ်ထားတဲ့ မြို့နယ်တွေကို လေကြောင်းနဲ့ ဗုံးကြဲတိုက်ခိုက်တာကြောင့် ပြီးခဲ့တဲ့ ဇန်နဝါရီလအတွင်း အရပ်သား ၁၃ ဦး သေဆုံးခဲ့ပြီး ၂၆ ဦး ထိခိုက်ဒဏ်ရာ ရခဲ့တယ်လို့ TNLA က ပြီးခဲ့တဲ့ ဖေဖော်ဝါရီ ၃ ရက်မှာ ထုတ်ပြန်ထားပါတယ်။
စစ်တပ်က တိုက်ပွဲ ဖြစ်ပွားခြင်းမရှိဘဲ အရပ်သားကို ဦးတည်ပြီး ရည်ရွယ်ချက်ရှိရှိ ဗုံးကြဲတိုက်ခိုက်နေတာကြောင့် လူထုတွေအနေနဲ့ စစ်ရေးသတိ အမြဲရှိဖို့ လိုအပ်သလို လေကြောင်းရန်ကို ကာကွယ်နိုင်ဖို့ လေကြောင်းရန် ကာကွယ်ရေးဆိုင်ရာ နည်းလမ်းတွေကိုလည်း လိုက်နာဆောင်ရွက်ဖို့ တိုက်တွန်းထားပါတယ်။
