ရွှေဖီမြေ၊ ဧပြီ ၄ ရက်
ကရင်အမျိုးသား အစည်းအရုံး- KNU ထိန်းချုပ်နယ်မြေ ခလယ်လွီထူ(ညောင်လေးပင်)ခရိုင် မူး(မုန်း)မြို့နယ်မှာ စစ်ကောင်စီတပ်က လက်နက်ကြီးနဲ့ ပစ်ခတ်လို့ ဒေသခံတစ်ဦး ထိမှန်ဒဏ်ရာ ရခဲ့တယ်လို့ KNU က ဒီနေ့ ဧပြီ ၄ ရက်မှာ ထုတ်ပြန်ထားပါတယ်။
မနေ့ ဧပြီ ၃ ရက် မနက် ၁၁ နာရီဝန်းကျင်မှာ စစ်ကောင်စီရဲ့ ခြေမြန်တပ်ရင်း (ခမရ ၃၅၁)ဟာ ဟောခို့ဂေါ် (ငထွေစုပ်)ရွာထဲ လက်နက်ကြီး ပစ်ခတ်ခဲ့လို့ ငထွေစုပ်ရွာက ၂၄ နှစ်အရွယ် နော်ခူခူ ထိမှန်ဒဏ်ရာ ရခဲ့ပြီး နေအိမ် ၂ လုံး ထိခိုက်ပျက်စီးခဲ့တယ်လို့ ဆိုပါတယ်။
အလားတူ ပြီးခဲ့တဲ့ ဧပြီ ၂ ရက် ညနေ ၅ နာရီမှာလည်း စစ်ကောင်စီရဲ့ ခြေမြန်တပ်ရင်း (ခမရ ၃၅၀၊ ၄၄၀)တို့က ဆောထိ(ရွှေကျင်) မြို့နယ် ညောင်ခြေထောက်ရွာကို ၈၁ မမ လက်နက်ကြီးနဲ့ ပစ်ခတ်ခဲ့တာကြောင့် ဒေသခံတွေရဲ့ နေအိမ်တချို့ ထိခိုက်ပျက်စီးခဲ့တယ်လို့ ဖော်ပြထားပေမဲ့ အရေအတွက် အတိအကျကိုတော့ ဖော်ပြထားတာ မရှိပါဘူး။
ငလျင်ဘေး ကူညီကယ်ဆယ်ရေးနဲ့ ပြန်လည် ထူထောင်ရေးလုပ်ငန်းတွေကို ဆောင်ရွက်နိုင်ဖို့ ဧပြီ ၂ ရက်ကနေ ၂၂ ရက်အထိ ရက် ၂၀ ကြာ ယာယီ ပစ်ခတ်တိုက်ခိုက်မှု ရပ်စဲသွားမယ်လို့ စစ်ကောင်စီက ဧပြီ ၂ ရက်မှာ ထုတ်ပြန်ထားပါတယ်။
စစ်တပ်က အပစ်ရပ်မယ်လို့ ကြေညာထားပေမဲ့ စစ်ကိုင်းတိုင်း၊ ရှမ်းမြောက်၊ ကချင်ပြည်နယ်နဲ့ KNU ထိန်းချုပ်နယ်မြေတွေမှာ လေကြောင်းနဲ့ ဗုံးကြဲတိုက်ခိုက်တာအပြင် လက်နက်ကြီးနဲ့ ပစ်ခတ်တာတွေ ရှိသလို မြေပြင်ထိုးစစ်ဆင်နေတာလည်း လုပ်နေတယ်လို့ သိရပါတယ်။
မနေ့ ဧပြီ ၃ ရက် မနက်ပိုင်းကစပြီး ဝိုင်းမော်အနီး လုမြန်နဲ့ စန်းကားရွာဘက်ရှိ KIA တပ်စခန်းကို စစ်တပ်ဘက်က စစ်ကြောင်း ထိုးလာလို့ တိုက်ပွဲ ပြင်းထန်သလို နောင်ချိုမြို့နယ် တောင်းခမ်းနဲ့ မန္တလေးတိုင်း သပိတ်ကျင်းမြို့နယ်မှာလည်း စစ်တပ်နဲ့ တော်လှန်ရေးတပ်တို့ တိုက်ပွဲ ဆက်ဖြစ်နေတယ်လို့ ဒေသခံအပြင် ရှေ့တန်းနဲ့ နီးစပ်တဲ့ သတင်းရင်းမြစ်တွေဆီက သိရပါတယ်။
