ပို့လဘား၊ ဧပြီ ၄ ရက်၊ ကွတ်ခိုင်
တအာင်းတပ်- PSLF/TNLA ထိန်းချုပ်ထားတဲ့ ကွတ်ခိုင်မြို့ ရပ်ကွက်(၅) ရှမ်းဘုန်းကြီးကျောင်းရှိ နေအိမ်တစ်အိမ် မီးလောင်မှု ဖြစ်ပွားခဲ့တယ်လို့ သိရပါတယ်။
ဒီနေ့ ဧပြီ ၄ ရက် မနက် ၁၁ နာရီခွဲကျော်မှာ မီးစလောင်ခဲ့တာဖြစ်ပြီး အဲဒီမီးလောင်မှုမှာ လူထိခိုက်တာတော့ မရှိဘူးလို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“တရုတ်ဆိုင်က သူ့ရဲ့ဂိုဒေါင်မှာ စလောင်ခဲ့တာ။ ဘယ်ဟာနဲ့ စလောင်တာလဲ မသိဘူး။ နောက်အိမ်ကိုပါ ကူးသွားလိုက်တယ်။ အဲဒီဆိုင်ရှင်က မူးလဲပြီး အခု ဆေးရုံ ရောက်နေတယ်”
မီးလောင်မှုကို မီးသတ်တပ်ဖွဲ့ဝင်နဲ့ ဒေသခံတွေ ဝိုင်းဝန်းမီးငြိမ်းခဲ့ကြပြီး ပျက်စီးဆုံးရှုံးသွားတဲ့ ပစ္စည်းတန်ဖိုးကိုတော့ မသိရသေးဘူးလို့ အဆိုပါ အမျိုးသားက ဆက်ပြောပါတယ်။
ရှမ်းမြောက် ကွတ်ခိုင်၊ မိုးမိတ်၊ ကျောက်မဲ စတဲ့မြို့တွေမှာ ပြီးခဲ့တဲ့ မတ်လအတွင်း မီးလောင်မှု ၆ ကြိမ် ဖြစ်ပွားခဲ့ပြီး ကျပ်သိန်းပေါင်း (၁,၄၀၀)ကျော် ဆုံးရှုံးခဲ့တယ်လို့ TNLA က ထုတ်ပြန်ထားပါတယ်။
