လွေးထွေး၊ မေလ ၂၂ ရက်၊ မူးမြို့
ပဲခူးတိုင်း မူးမြို့နယ်မှာ စစ်ကောင်စီရဲ့တစ်ဖက်သတ် ပစ်ခတ်လိုက်တဲ့ လက်နက်ကြီးကြောင့် ကလေးငယ် ၁ ဦးသေဆုံးခဲ့ပြီး ၅ ဦး ထိခိုက်ဒဏ်ရာရခဲ့ကြောင့် KNU ရဲ့ ဒီနေ့ မေလ ၂၂ ရက်ရဲ့ ထုတ်ပြန်ချက်အရ သိရပါတယ်။
မေလ ၁၉ ရက်က ခမရ-၃၅၁နဲ့ ခလရ-၆၀ က ငထွေစုတ်ကျေးရွာဘက်ကို လက်နက်ကြီးပစ်ခတ်တာနဲ့ မေလ ၂၀ ရက်မှာလည်း နတ်သံကွင်းမှာ အခြေချထားတဲ့ စစ်ကောင်စီတပ်က ငနွားဆိပ်ကျေးရွာ၊ အညာစုကျေးရွာ၊ ရင်းတိုက်ကုန်းကျေးရွာ၊ နောင်ကုန်းကျေးရွာ၊ တောင်စုကျေးရွာ၊ ကြက်တက်ညောင်ပင် ကျေးရွာ၊ မရမ်းစိန်လေး၊ အရှေ့တောင်စု၊ အနောက်တောင်စုနဲ့ ကျွန်းကုန်းကျေးရွာတွေကို လက်နက်ကြီးနဲ့ ပစ်ခတ်တိုက်ခိုက်ခဲ့တာ ဖြစ်ပါတယ်။
KNU ရဲ့ ပြောရေးဆိုခွင့်ရှိသူ ပဒို စောတောနီးက “အခုတလော ထိုင်းနယ်စပ်အနီးမှာ တိုက်ပွဲဖြစ်နေတာဖြစ်တယ်။ ခဏခဏလည်း စခန်းသိမ်းတိုက်ပွဲ ဖော်ဆောင်နေလို့ သူတို့က လူထုတွေကို ပြန်မဲတာဘဲဖြစ်တယ်။ လေကြောင်းနဲ့ရော လက်နက်ကြီးနဲ့ပါ ပတ်ပစ်လို့ တချို့ဒေသက လူထုတွေက ဘေးလွတ်ရာကို ပြေးနေရတယ်” လို့ ပြောပါတယ်။
၎င်းပစ်ခတ်မှုကြောင့် အသက် ၉ နှစ်အရွယ် ကလေးငယ် ၁ ဦး သေဆုံးခဲ့ပြီး အသက် ၁၁ နှစ်အရွယ် ကလေး ၂ ဦးအပါအဝင် ၅ ဦး ထိခိုက်ဒဏ်ရာရခဲ့တာ ဖြစ်တယ်လို့ ဆိုပါတယ်။
လူထိခိုက်သေဆုံးတာအပြင် အရပ်သားနေအိမ်တွေလည်း ထိခိုက်ပျက်စီးခဲ့ရသလို ဒေသခံတချို့လည်း ထွက်ပြေးတိမ်းရှောင်နေရကြောင်း ဆိုပါတယ်။
အပစ်အခတ်ရပ်စဲကြောင်း ကြေညာထားတဲ့ စစ်ကောင်စီတပ်ဟာ မြေပြင်မှာ ထိုးစစ်ဆင်နေတာကြောင့် တိုင်းရင်းသားလက်နက်ကိုင်အဖွဲ့နဲ့ နေ့စဉ် တိုက်ပွဲဖြစ်ပွားနေသလို လေကြောင်းကိုပါအသုံးပြုပြီး နေ့စဉ် တိုက်ခိုက်နေတာကြောင့် အရပ်သားထိခိုက်သေဆုံးနေရတာတွေ ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
