ပျားကြီး၊ ဇွန်လ ၁၃ ရက်၊ ယင်းမာပင်
ဝမ်ပေါင်ကြေးနီစီမံကိန်းနယ်မြေအနီးမှာရှိတဲ့ ကျေးစာကျကျေးရွာက လူပေါင်း ၄၀ ကျော်ကို လူသားဒိုင်းအဖြစ် အသုံးပြုဖို့ စစ်ကောင်စီက ဒီနေ့ ဇွန်လ ၁၃ ရက် မနက်ပိုင်းမှာ စစ်ကြောင်းထိုး ဝင်ရောက်ပြီး ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။
လက်ပံတောင်းတောင်ဒေသကနေ ကြေးနီတွေ သယ်ယူမယ့် ယာဥ်တန်းကို အကာအကွယ်ပေးဖို့အတွက် အခုလို ဒေသခံပြည်သူတွေကို ဖမ်းဆီးခဲ့တာ ဖြစ်ပါတယ်။
“မနေ့က ဝမ်ပေါင်ထဲကို ကြေးနီသယ်မယ့် ကားတွေ ဝင်သွားတယ်။ ဒီမနက်ကျ ကျေးစာကျရွာကို တိတ်တိတ်လေးဝင်စီးပြီး ရွာထဲတွေ့သမျှ အကုန်ဖမ်းသွားတာပဲ။ ကြေးနီကားတွေ သယ်ဖို့ လူသားဒိုင်းလုပ်မယ့်သဘောပဲ” လို့ လက်ပံတောင်းတောင် ဒေသခံတစ်ဦးက ပြောပါတယ်။
လက်ပံတောင်းတောင်က ထွက်ရှိလာတဲ့ ကြေးနီတွေကို ယာဥ်တန်းတွေနဲ့ သယ်ယူရာမှာ မကြာခဏ မိုင်းဆွဲတိုက်ခိုက်မှုနဲ့ ပစ်ခတ်တိုက်ခိုက်မှုတွေ ခံရလေ့ရှိတာကြောင့် အခုနောက်ပိုင်းမှာ ဒေသခံတွေကို ဖမ်းဆီးပြီး လူသားဒိုင်းအဖြစ် အသုံးပြုနေတာဖြစ်တယ်လို့ ဒေသခံအမျိုးသမီးတစ်ဦးက ဆိုပါတယ်။
ဖမ်းဆီးခံရသူတွေထဲမှာ အမျိုးသမီးတွေလည်း ပါဝင်ခဲ့ပြီး လက်ရှိအချိန်မှာ စစ်ကောင်စီတပ်တွေက ပုသိမ်-မုံရွာလမ်းပေါ်မှာ လူသားဒိုင်းအဖြစ် အသုံးပြုပြီး လုံခြုံရေး ကင်းယူထားတယ်လို့ အသက် ၅၅ နှစ်အရွယ် မျက်မြင်တွေ့သူ ဒေသခံအမျိုးသားတစ်ဦးက ဆိုပါတယ်။
လက်ရှိအချိန်မှာ စစ်ကြောင်းထိုးမှုတွေ ဆက်ပြီးရှိနေသေးတာကြောင့် စီမံကိန်းဧရိယာ အနီးဝန်းကျင်မှာရှိတဲ့ ကျေးစာကျ၊ အုံတုံပင်၊ ထန်းတောကြီး၊ ဒုန်းတော၊ ဂုဏ်တောစတဲ့ ကျေးရွာပေါင်း ၂၀ ထက်မနည်းက ဒေသခံတွေဟာ ဘေးလွတ်ရာကို ထွက်ပြေးတိမ်းရှောင်နေကြရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
