ပျားကြီး၊ ဇွန်လ ၁၃ ရက်၊ မန္တလေး
မန္တလေးမြို့မှာ စစ်ကောင်စီမွေးမြူထားတဲ့ ပျူစောထီးငယ်တွေရဲ့ ရမ်းကားမှုတွေဟာ နေစဥ်နီးပါးရှိနေပြီး လူငယ်တွေအပါအဝင် ရိုက်နှက်နှိပ်စက်ခံရမှုတွေ အများအပြားရှိလာတယ်လို့ဒေသခံတွေက ပြောပါတယ်။
စစ်ကောင်စီဟာ အာဏာသိမ်းပြီးနောက်ပိုင်း အသက် ၁၃ နှစ်ကနေ ၁၆ နှစ်ကြားရှိတဲ့ လူငယ်တွေကို သတင်းပေးဖို့နဲ့ လက်တိုလက်တောင်း ခိုင်းစေဖို့အတွက် မွေးမြူထားတာဖြစ်ပြီး အခုနောက်ပိုင်းမှာ လုယက်ရမ်းကားမှုတွေပါ လုပ်ဆောင်ဖို့ ခွင့်ပြုပေးထားတာ ဖြစ်ပါတယ်။
“သူခိုး၊ ကြမ်းပိုးတွေနဲ့ မူးယစ်ဆေးစွဲနေတဲ့ ကလေးတွေကို မွေးထားတာပေါ့။ မြီးကောင်ပေါက်အရွယ်ဆိုတော့ မြှောက်ပေးရင် ဘာမဆိုလုပ်ကြတာပဲ။ သူတို့ရှေ့က ဖြတ်သွားလို့ ကြည့်မိရင်တောင် ပြဿနာလိုက်ရှာပြီး ရိုက်ကြနှက်ကြတာ။ တခါတလေဆို ဓားတွေပါ ပါတယ်။ ခဏခဏဖြစ်နေတာပဲ”လို့ အသက် ၅၀ အရွယ် ဒေသခံအမျိုးသားတစ်ဦးက ပြောပါတယ်။
ပြီးခဲ့တဲ့ ရက်ပိုင်းအတွင်းကလည်း ပျူစောထီးငယ်တွေဟာ လူငယ်တွေနောက်ကိုလိုက်ပြီး ကန်ကြောက်ရိုက်နှက်နေတဲ့ Video file တစ်ခု လူမှုကွန်ရက်ပေါ်မှာ မြင်တွေ့ခဲ့ရပါတယ်။
ဒီလို ပျူစောထီးငယ်တွေ ရမ်းကားမှုဟာ စစ်ကောင်စီတွေ တပ်စွဲထားတဲ့ နေရာတွေရှိတဲ့ ဆင်ခြေဖုံးရပ်ကွက်တွေထဲမှာ အများဆုံး ဖြစ်ပွားခဲ့ပြီး ရဲကလည်း အရေးယူ ဖမ်းဆီးတာမျိုးမရှိဘူးလို့ ဒေသခံတွေက ဆိုပါတယ်။
ပျူစောထီးတွေ ရမ်းကားမှု အများဆုံး ကျူးလွန်လေ့ရှိတဲ့ နေရာတွေဟာ အောင်မြေသာစံ၊ ပုသိမ်ကြီး၊ ချမ်းမြသာစည်၊ ပြည်ကြီးတံခွန်နဲ့ အမရပူရမြို့နယ်တွေက ဆင်ခြေဖုံး ရပ်ကွက်တွေဖြစ်ပြီး နေ့ညမရွေး ရမ်းကားနေတာကြောင့် လုံခြုံရေးပိုင်းဆိုင်ရာ စိုးရိမ်ထိတ်လန့်မှုတွေ ရှိနေတယ်လို့ ဒေသခံတွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
