ကျုံဒိုးမြို့နယ် ကော့ဘော်ကျေးရွာမှာ ရက်လည်လုပ်‌နေချိန် လက်နက်ကြီး ကျရောက်ပေါက်ကွဲလို့ ကလေး ၂ ဦးနဲ့ မိခင်အပါအဝင် ၆ ဦး သေဆုံး

ရဲမာန်၊ ဇွန်လ ၁၅ ရက်၊ ကျုံဒိုး

ကရင်ပြည်နယ် ကျုံဒိုးမြို့နယ် ကော့ဘော်ကျေးရွာမှာ ရက်လည်ပြုလုပ်တဲ့ အိမ်ပေါ်ကို လက်နက်ကြီးကျပေါက်ကွဲလို့ ကလေး ၂ ဦး၊ မိခင် ၁ ဦး နဲ့ အမျိုးသား ၃ ဦး စုစုပေါင်း ၆ဦး သေဆုံးခဲ့တယ်လို့ ဒေသခံအမျိုးသမီးက ရွှေဖီမြေကို ပြောပါတယ်။

ပြီးခဲ့တယ် ဇွန်လ ၁၂ ရက် ညနေ ၅ နာရီခန့် အိမ်ဘေးက ရေတွင်းမှာ ရေချိုးနေစဉ်အတွင်း လက်နက်ကြီး ကျရောက်ခဲ့တာလို့ ဒေသခံအမျိုးသမီး က ပြောပါတယ်။

“အခုလည်း ရွာပြန်မ၀င်ရဲကြဘူး။ တချို့ဆို တခြားရွာမှာ သွားနေ နေရတယ်။ညလည်း မအိပ်ရဲဘူး။ တခြားရွာကို ဆိုင်ကယ်သွားလိုက် မနက်ကျရင် အိမ်ကို ပြန်လာကြည့်လိုက် သွားသွားလာလာ လုပ်နေရတယ်။တချို့ဆို ဘားအံဘက်ကို ပြောင်းသွားကြတယ်”လို့ အထက်ပါ အမျိုးသမီးက ဆက်ပြောပါတယ်။

သေဆုံးသွားတဲ့ ကလေး ၂ ဦး ဟာ ယောက်ကျားလေး ၁၀ နှစ် ၊ မိန်းကလေးက ၅ နှစ်တို့ ဖြစ်ပြီး သေဆုံးသွားတဲ့ အမျိုးသမီးကတော့ ၎င်းတို့ရဲ့ မိခင်ဖြစ်တယ်လို့ ၎င်းက ဆက်ပြောပါတယ်။

ကော့ဘော်ရွာ နဲ့ မနီးမဝေးနေရာမှာတော့ တိုက်ပွဲခဏခဏ ဖြစ်ပွါးလေ့ရှိပြီး ရွာမှာတော့ တိုက်ပွဲ ဖြစ်ပွားတာ မရှိဘူးလို့ ၎င်းက ဆက်ပြောပါတယ်။

ပြီးခဲ့တဲ့ ဇွန်လ ၉ ရက် နေ့လည် ၂ နာရီခန့်မှာ ကရင်ပြည်နယ် ကော့ကရိတ်မြို့နယ် ပန်ရပ်ကျေးရွာမှာလည်း စာသင်ကျောင်းကို လက်နက်ကြီး ကျရောက်ပေါက်ကွဲခဲ့တာ‌ကြောင့် ကလေး ၃ ဦး၊ အမျိုးသား ၁ ဦးနဲ့ ဆရာမ ၁ ဦး သေဆုံးခဲ့ပါတယ်။

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram