ရဲမာန်၊ ဇွန်လ ၁၃ ရက်၊ ဟိုပုံး
ရှမ်းတောင် ပအိုဝ်းဒေသ ဟိုပုံးမြို့နယ် မြို့ဦးကွက်သစ် နယ်မြေ ၁ မှာ မိုးကြီးလို့ အုတ်တံတိုင်းနဲ့ လမ်းတွေ ပြိုကျပျက်စီးနေတယ်လို့ ဒေသခံ အမျိုးသမီးက ရွှေဖီမြေကို ပြောပါတယ်။
ဇွန်လ ၁၁ ရက် ညပိုင်းမှာ မိုးသည်းထန်စွာ ရွာသွန်းခဲ့ပြီး မနေ့ ဇွန်လ ၁၂ ရက် မနက် ၁ နာရီခန့်က အိမ်တွေထဲ ရေ စ၀င်ခဲ့ပြီး အိမ်တိုင်းနီးပါးလည်း အုတ်တံတိုင်း ပြိုကျကာ လမ်းတွေမှာ ရေလျှံနေတယ်လို့ အထက်ပါ အမျိုးသမီးက ဆက်ပြောပါတယ်။
“အရင်နှစ် မိုးကြီးတုန်းကထက် ဒီနှစ်က ပိုဆိုးတယ်။ အရင်နှစ်က ညနေခင်းအချိန် ဒီနှစ်ကတော့ ညဖက်ဆိုတော့ ပိုဆိုးတယ်” လို့ ၎င်းက ပြောပါတယ်။
ဒီနှစ်မိုးက ပိုကြီးပြီး ရေတွေလည်း ပိုကြီးတဲ့အတွက် မြောင်းနဲ့လမ်းပေါ်သာမက အိမ်တွေထဲ ၀င်လာပြီး အုတ်တံတိုင်းနဲ့ လမ်းတွေ ပြိုကျပျက်စီးတဲ့အဆင့်ထိ ရောက်လာတယ်လို့ သူမက ပြောပါတယ်။
မနှစ်က မိုးကြောင့် ပျက်စီးသွားတဲ့ လမ်းနဲ့မြောင်းတွေကို ပြင်ဆင်ထားပေမဲ့ ရေအား သန်တာကြောင့် အကုန်ပါသွားခဲ့တယ်လို့ ဆိုပါတယ်။
၂၀၂၄ စက်တင်ဘာ ၁၀ ရက်ကလည်း ရာဂီမုန်တိုင်းကြောင့် ဟိုပုံးမြို့နယ်ထဲက ကျေးရွာ ၂၅ ရွာတွေမှာ တောင်ကျရေ လွှမ်းပြီး မြေပြိုကျတဲ့ ဖြစ်စဉ်လည်း ရှိခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
