ရွှေဖီမြေ၊ ဇွန်လ ၂၅ ရက်
နေပြည်တော်ရှိ မင်္ဂလာသီရိဟိုတယ်မှာ သုံးရက်တိုင်တိုင် ကျင်းပပြုလုပ်မဲ့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက ဦးဆောင်ကျင်းပတဲ့ ငြိမ်းချမ်းရေးဖိုရမ်ကို ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ FPNCC ရဲ့ အဖွဲ့ဝင်ဖြစ်တဲ့ UWSA, SSPP, NDAA တို့က တက်ရောက်ခဲ့ကြောင်း စစ်ကောင်စီပိုင် သတင်းဌာနတွေမှာ ရေးသားထားပါတယ်။
အဲဒီပွဲကို ဒီနေ့ ဇွန်လ ၂၅ ရက်ကနေ ၂၇ ရက်အထိ ၃ ရက်ဆက်တိုက် ကျင်းပသွားမှာဖြစ်ပြီး “ဝ” ပြည်သွေးစည်းညီညွတ်ရေးတပ်မတော် UWSA မှ ဦးညီရန်း၊ ရှမ်းပြည်တိုးတက်ရေးပါတီ SSPP မှ စပ်နော်လိတ်နဲ့ မိုင်းလားတပ်လို့ လူသိများတဲ့ အမျိုးသားဒီမိုကရက်တစ် မဟာမိတ်တပ်မတော် NDAA မှ ဦးချစ်ဆွေ စတဲ့ကိုယ်စားလှယ်တွေ တက်ရောက်ခဲ့တယ်လို့ ဆိုပါတယ်။
ဒါ့အပြင် NCA လက်မှတ်ထိုးထားတဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO နာယက ဗိုလ်မှူးကြီး ခွန်ဥက္ကာ၊ ဒီမိုကရေစီအကျိုးပြု ကရင့်တပ်မတော် DKBA မှ စောစိန်ဝင်း၊ မွန်အမျိုးသား လွတ်မြောက်ရေးတပ်မတော် NMSP မှ နိုင်အောင်မငေး၊ လားဟူ ဒီမိုကရက်တစ်အစည်းအရုံး LDU မှ ကျားဆော်လမွန်၊ ကရင်အမျိုးသား အစည်းအရုံး-ကရင်အမျိုးသား လွတ်မြောက်ရေးတပ်မတော် ငြိမ်းချမ်းရေးကောင်စီ KNU/KNLA-PC မှ စော်ကျော်ညွှန့်နဲ့ ရခိုင်ပြည် လွတ်မြောက်ရေးပါတီ ALP မှ စောမြရာဇာလင်း စတဲ့သူတွေလည်း တက်ရောက်ခဲ့တာ ဖြစ်ပါတယ်။
တိုင်ရင်းသား လက်နက်ကိုင်တွေအပြင် တရုတ်၊ ထိုင်း၊ ရုရှား၊ အိန္ဒိယနိုင်ငံမှ ပညာရှင်တွေကလည်း ငြိမ်းချမ်းရေးဆွေးနွေးပွဲကို တက်ရောက်ဆွေးနွေးခဲ့တယ်လို့ ဆိုပါတယ်။
အဲဒီဆွေးနွေးပွဲကို စစ်ခေါင်းဆောင် မင်းအောင်လှိုင်လည်း တက်ရောက်ခဲ့ပြီး ဒီမနက် ဆွေးနွေးပွဲအစမှာ အဖွင့်အမှာစကား ပြောကြားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
