နမ့်ဆန်မှာ မြေပြိုလို့ သားအဖနှစ်ဦး သေဆုံး

‎လွေးထွေး၊ ဇွန်လ ၂၆ ရက်၊ နမ့်ဆန်

‎တအာင်းဒေသ နမ့်ဆန်မြို့ ဇယန်းကြီးရပ်ကွက် (၈) ဟိုချောင်းသွားတဲ့ ကားလမ်းမှာ မြေပြိုလို့ သားအဖ နှစ်ဦးပွဲချင်းပြီး သေဆုံးသွားခဲ့ကြောင်း အိမ်နီးနားချင်းတွေရဲ့ ပြောပြချက်အရ သိရပါတယ်။

‎ဒီနေ့ ဇွန်လ ၂၆ ရက် မနက် ၃ နာရီဝန်းကျင်မှာ ကားလမ်းဘေးရှိ နေအိမ်တစ်ခုအပေါ်ကို မြေပြိုပိတာကြောင့် နေအိမ်ထဲ အိပ်နေတဲ့ ကိုညွှန့်ဝင်းနဲ့ ၂ နှစ်အရွယ် ကလေးငယ်တို့ သေဆုံးသွားခဲ့ပါတယ်။

‎ရပ်ကွက်နေ အမျိုးသားက “ဒီတလော နမ့်ဆန်မှာ မိုးတွေ ဆက်တိုက်ရွာနေတာ။ အိမ်တွေကလည်း ကမ်းပါးမှာဘဲဆိုတော့လေ။ အိမ်ကလည်း တဲအိမ်လေးဆိုတော့ ပိုအထိနာသလို ဖြစ်သွားတယ်” လို့ ပြောပါတယ်။

‎မိုးဆက်တိုက်ရွာနေတာကြောင့် နမ့်ဆန်မြို့က လူထုတွေအနေနဲ့ လျှိုမြောင်းနဲ့ မြေနိမ့်ပိုင်းတွေမှာ မနေထိုင်ကြဖို့နဲ့ မြေပျော့တဲ့ ကမ်းပါးဘေးမှာ ကပ်နေဖို့ မသင့်ဘူးလို့လည်း ဆိုပါတယ်။

‎အလားတူ ပြီးခဲ့တဲ့ မေလနောက်ဆုံးအပတ်ကလည်း နမ့်ဆန်မြို့မှာ မိုးဆက်တိုက်ရွာသွန်းတာကြောင့် နေရာတချို့မှာ မြေပြိုမှု ဖြစ်ပွားခဲ့ပါတယ်။

‎၂၀၂၃ ခုနှစ်ကလည်း မိုးအဆက်မပြတ်ရွာတာကြောင့် မြေပြိုလို့ နမ့်ခမ်းမြို့ ပန်ဆေးအုပ်စု ဝါလုရွာက ကလေးတစ်ဦးနဲ့ အသက် ၆၅ နှစ်အရွယ် အမျိုးသမီးတစ်ဦး သေဆုံးခဲ့သလို မန်ကန်ရွာက ကလေးတစ်ဦးလည်း မြေပိ သေဆုံးပြီး ၂ ဦး ဒဏ်ရာရခဲ့ပါတယ်။

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram