မိုင်းအရှိုင်း၊ ဇွန်လ ၂၇ ရက်၊ မိုးကုတ်
တအာင်းတပ်- PSLF/TNLA ထိန်းချုပ်တဲ့ မိုးကုတ်မြို့မှာ မိုးတွေအဆက်မပြတ် ရွာသွန်းတာကြောင့် လမ်းပိုင်းနေရာတချို့ ပြိုကျတာတွေဖြစ်ပေါ်နေတယ်လို့ သိရပါတယ်။
မိုးကုတ်မြို့ အရှေ့ပိုင်းနဲ့အနောက်ပိုင်း ဆက်သွယ်ထားတဲ့လမ်းနဲ့ မိုးကုတ်အနောက်ပိုင်းက ပြောင်းပြင်ရွာအတက်မှာရှိတဲ့ ရတနာရှင်လမ်းတို့ ပြိုကျပြီး လမ်းပိတ်ဆို့သွားမှု ဖြစ်ပေါ်ခဲ့ပါတယ်။
ဒါ့အပြင် မိုးကုတ်-မန္တလေးလမ်းပေါ်ရှိ အုန်ဒါန်ကျေးရွာနားက ကတ္တရာလမ်းလည်း ပြိုကျခဲ့တယ်လို့ လမ်းရှင်းလင်းရေး ဆောင်ရွက်ပေးတဲ့ မိုးကုတ်ဗျူဟာတပ်သားတစ်ဦးက ရွှေဖီမြေကိုပြောပါတယ်။
“အဓိကတော့လမ်းကြောင်းပိတ်ဆို့ နေတာတွေ ရှင်းလင်းတာပေါ့။ ဒီမိုးကုတ်ရှေ့ပိုင်းနဲ့အနောက်ပိုင်းကြားက ဘားပြိုတာ လမ်းပိတ်တာတွေကို အကုန်လုံးလုပ်ဖို့ကတော့ စက်အားနဲ့မှရမှာပေါ့”
ဒီနေ့ ဇွန်လ ၂၇ရက်နေ့ မနက်ပိုင်းမှာလည်း မိုးအဆက်မပြတ်ရွာသွန်းတာကြောင့် အရှေ့ပိုင်းမှာ ရေကြီးရေလျှံမှုလည်း ဖြစ်ပေါ်ခဲ့ပါတယ်။
မနေ့ ဇွန်လ ၂၆ ရက်နေ့မှာလည်း TNLA ထိန်းချုပ်ဒေသ နမ့်ဆန်မြို့မှာ မြေပြိုကျမှုဖြစ်ပွားခဲ့ပြီး သားအဖ ၂ ယောက် သေဆုံးသွားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
