မိုင်းရူပ၊ ဇူလိုင် ၅ ရက်
စစ်ကောင်စီနဲ့ တအာင်းတပ်မတော်- TNLA အကြားဖြစ်ပွားနေတဲ့ တိုက်ပွဲတွေရပ်ဖို့ PSLF/ TNLAနဲ့ စစ်ကောင်စီကို တရုတ်နိုင်ငံက ခေါ်ယူတွေ့ဆုံခဲ့ကြောင်း PSLF/TNLA ရဲ့ပြောရေးဆိုခွင့်ရှိသူ လွေးယေဦးက ပြောပါတယ်။
ဒီရက်ပိုင်းအတွင်း PSLF/TNLA ကို တရုတ်နိုင်ငံဘက်က ခေါ်ယူတွေ့ဆုံခဲ့ပြီး စစ်ကောင်စီနဲ့ တအာင်းတပ်အကြား တစ်ဖက်နဲ့တစ်ဖက် ထိုးစစ်ဆင်တာတွေရပ်ဖို့၊ အပစ်ရပ်ဖို့နဲ့ အရပ်သားလူထုတွေကို ကာကွယ်ဖို့ တရုတ်ဘက်က ပြောကြားခဲ့တယ်လို့ ဆိုပါတယ်။
“ပြီးခဲ့တဲ့ရက်မှာ ကျမတို့ တွေ့ဆုံမှုတွေ ပြုလုပ်ခဲ့ပါတယ်။ တရုတ်အစိုးရကနေတစ်ဆင့် ကျမတို့ PSLF/TNLA ဗဟို တွေ့ဆုံတာရှိပါတယ်။ စစ်ကောင်စီကိုလည်း တွေ့ဆုံဆွေးနွေးတာရှိပါတယ်။ တရုတ်အစိုးရရဲ့ ကြားဝင်မှုက ခရီးရောက်ပါတယ်။ ကျမတို့ တစ်ဖက်နဲ့တစ်ဖက် အပစ်ရပ်နိုင်ဖို့ ကြိုးပမ်းဆောင်ရွက်နေတာမျိုးလည်း ရှိပါတယ်” လို့ ဒီနေ့ ဇွန်လ ၅ ရက်မှာ ပြုလုပ်တဲ့ သတင်းစာရှင်းလင်းပွဲမှာ လွေးယေဦးက ပြောပါတယ်။
ဆွေးနွေးပွဲတက်ရောက်ခဲ့တဲ့နေ့နဲ့ တက်ရောက်ခဲ့သူ အတိအကျကိုတော့ မယေဦးက ထုတ်ဖော်ပြောကြားတာ မရှိပါဘူး။
ဒီတွေ့ဆုံမှုဟာ စစ်ကောင်စီနဲ့ TNLA ကို တရုတ်နိုင်ငံဘက်က တစ်ဖွဲ့ချင်း ခေါ်ယူတွေ့ဆုံတာဖြစ်ပြီး လာမယ့် သြဂုတ်လထဲမှာ တရုတ်နိုင်ငံရဲ့ ကြားဝင်စေ့စပ်မှုနဲ့ စစ်ကောင်စီနဲ့ TNLA အကြား တွေ့ဆုံဖို့ ရှိနေပါတယ်။
မြေပြင်မှာတော့ နောင်ချိုမြို့နယ်ရှိ TNLA တပ်စခန်းတွေကို စစ်ကောင်စီတပ်က ထိုးစစ်ဆင်တိုက်ခိုက်နေတာကြောင့် နောင်ချိုမြို့အနီး တိုက်ပွဲတွေဆက်လက်ပြင်းထန်နေပြီး နောင်ချိုမြို့ လက်မလွှတ်ရရေးအတွက် ဆက်လက်ခုခံကာကွယ်သွားမယ်လို့ TNLAဘက်က ဆိုပါတယ်။
ဒါ့အပြင် TNLA ထိန်းချုပ်ထားတဲ့ဒေသတွေကို စစ်ကောင်စီတပ်က လေယာဥ်နဲ့ ဗုံးကြဲတိုက်ခိုက်မှုတွေ ဆက်တိုက်လုပ်ဆောင်နေပြီး အရပ်သားသေဆုံးမှုတွေလည်း ဆက်လက်မြှင့်တက်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
