မြတ်နိုး၊ ဇွန် ၃၀၊ ဖားကန့်
ကချင်ပြည်နယ်၊ ဖားကန့် မြို့နယ်၊ လုံးခင်း သုဿာန် အနီးမှာ ဇွန်လ ၃၀ ရက်နေ့ ညနေ ၄ နာရီကျော်ခန့်က အမျိုးသား ၁ဦး ထပ်မံ ပစ်သတ်ခံရကြောင်း ဒေသခံတွေဆီက သိရပါတယ်။
“လုံးခင်း အပေါ်ကုန်း ဆေးရုံဘက် သင်္ချိုင်းကုန်း လမ်း ဘေးနားမှာ ပစ်သတ်ထားတာ”လို့ ဒေသခံ ၁ဦးက ပြောပါတယ်။
ပစ်သတ်ခံရသူက ခန့်မှန်း အသက် ၅၀ ဝန်းကျင်ခန့် ရှိနိုင်ပြီး ဒီနေ့ ဇွန်လ ၃၀ ရက်နေ့ ညနေ ညနေ ၄ နာရီကျော်ခန့်က ပစ်သတ်ခံရတာ ဖြစ်တယ်လို့ သူက ပြောပါတယ်။
“သူ ဘာလဲ မသိဘူး။ ဘိန်းစားနဲ့လည်း မတူပါဘူး။ ဘာလို့ ပစ်သတ် ခံရလဲ မသိဘူး။ လက်နက်ကိုင်အဖွဲ့က လူလားတော့ မသိဘူး။” လို့ ဒေသခံ လူငယ် တစ်ဦးက ပြောပါတယ်။
လူသေအလောင်းကိုတော့ လုံးခင်း သင်္ဂဟလူမှုကူညီရေးအသင်းက ကူညီကောက်ယူကာ သုဿာန်မှာ ထားရှိကာ အသိဆွေမျိုးတွေ ဆက်သွယ်လာဖို့ ပြောထားတယ်လို့ သူက ပြောပါတယ်။
ဇွန်လ ၂၈ ရက်နေ့ နေ့လယ် ၁၂ နာရီခန့်ကလည်း လုံးခင်း ရွာလယ် လမ်းဆုံထောင့်၊ မဲကြီးဖြတ်ခုံ အနီး အသီးဆိုင်နားမှာ အမျိုးသား တစ်ဦး သေနတ်နဲ့ ပစ်သတ်ခံခဲ့ရပါသေးတယ်။
ဖားကန့်ကို စစ်ကောင်စီစစ်ကြောင်း ရောက်ရှိလာပြီးနောက် ပြီးခဲ့တဲ့ မေလ ၂၇ ရက်နေ့ကစ ဇွန်လ ၂၈ ရက်နေ့အထိ စစ်ကောင်စီစစ်ကြောင်းထိုးချိန် သေနတ် နဲ့ လက်နက်ကြီးကျည် ထိမှန်၊ ဖမ်းဆီး နှိပ်စက်သတ်ဖြတ်ခံရတာတွေ၊ ယမ်းဂိုဒေါင်တွေ တိုက်ခိုက် ဖျက်ဆီးခံရလို့ သေဆုံးရတဲ့ အရပ်သားတွေ၊ လမ်းဘေး ပစ်သတ်ခံရတဲ့ ဆေးသမားတွေ၊ သတ်ဖြတ်ပြီး ရေထဲအလောင်း ပစ်ခတ်ခံရတာတွေကြောင့် သေဆုံးသွားတဲ့ အရပ်သား စုစုပေါင်း ၃၉ ဦး ရှိလာပြီဖြစ်ကြောင်း ဒေသခံတွေဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
