လွေးထွေး၊ ဇွန်လ ၁၂ ရက်၊ တန့်ယန်း
စစ်ကောင်စီတပ် ထိန်းချုပ်ထားတဲ့ ရှမ်းမြောက် တန့်ယန်းမြို့နယ်မှာ တပ်မိသားစုဝင် အမျိုးသမီးတစ်ဦးက ဓားပြတိုက် သတ်ဖြတ်ခံခဲ့ရပြီး ငွေကျပ် သိန်း ၄၀၀ ပါသွားခဲ့ကြောင်း ဖြစ်စဉ်ကိုသိရသူ အမျိုးသမီးတစ်ဦးရဲ့ ပြောပြချက်အရ သိရပါတယ်။
ဇွန်လ ၁၀ ရက် ည ၇ နာရီ ဝန်းကျင်မှာ တန့်ယန်း-နမ့်ပေါင်အထွက် လမ်းမပေါ်မှာ ဆိုင်ကယ်စီးပြီး ပြန်လာတဲ့ အသက် ၄၀ ဝန်းကျင်အရွယ်ရှိတဲ့ အဲဒီအမျိုးသမီး တန့်ယန်းမြို့အထွက် ဆိုင်းဘုတ်အနီးမှာ ဓါးနဲ့ ထိုးသတ်ခံခဲ့ရတာ ဖြစ်ပါတယ်။
ဖြစ်စဉ်ကို သိရှိသူ အမျိုးသမီးက “သူက စစ်သားမိန်းမဘဲ။ ဘယ်တပ်ကလဲတော့ သေချာမသိဘူး။ သူက နမ့်ပေါင်ဘက်ကနေ အိမ်ပြန်လာတဲ့အချိန် ဓါးထိုးခံရတာ။ ငွေလည်း သိန်း ၄၀၀ လောက်ပါတယ်။ သူ့ဆိုင်ကယ်တော့ မယူသွားဘူး” လို့ ပြောပါတယ်။
၎င်းအမျိုးသမီးဟာ အသက် ၄၀ ဝန်းကျင်အရွယ် ဒေါ်အေးဖြစ်ပြီးတော့ သတင်းမထွက်အောင် စစ်ကောင်စီတပ်က နှုတ်ပိတ်ထားပြီး တရားခံကို ဖမ်းမိအောင် စစ်ဆေးတင်းကြပ်နေတာတွေ လုပ်ဆောင်နေကြောင်း အထက်ပါ အမျိုးသမီးက ဆိုပါတယ်။
တန့်ယန်းမြို့မှာ စစ်ကောင်စီတပ်နဲ့ “ဝ” တပ်တို့ ပူးပေါင်းထိန်းချုပ်နေပြီးတော့ လောင်းကစားဝိုင်းတွေလည်း ၅၀ ကျော် ထပ်တိုးလာတာကြောင့် မကြာခဏ ခိုးမှု၊ လုယက်မှုနဲ့ ဓားပြတိုက်မှုတွေ ဖြစ်ပွားနေပြီး မူးယစ်ဆေးဝါးတွေလည်း အလွယ်တကူ ရနေကြောင်း ဒေသခံတွေရဲ့ ပြောပြချက်အရ သိရပါတယ်။
ပြီးခဲ့တဲ့ ဖေဖော်ဝါရီ ၁၃ ရက်ကလည်း တန့်ယန်းမြို့က ရွှေဆိုင်တစ်ခုကို အမျိုးသားတစ်ဦးက သေနတ်နဲ့ ပစ်ခတ်ခဲ့တာကြောင့် ဆိုင်ရှင်အမျိုးသား သေဆုံးခဲ့သလို ရွှေတွေလည်း ယူဆောင်သွားခဲ့တဲ့ ဖြစ်စဉ် ဖြစ်ပွားခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
