မိုင်းရူပ၊ ဇွန်လ ၁၀ ရက်၊ မန်တုံ
တအာင်းဒေသ မန်တုံမြို့နယ် မိုင်းဘော်(နမ့်ဟိုင်း)ကျေးရွာမှာ တအာင်းတပ်မတော် TNLA ရဲ့ တပ်ဖွဲ့ဝင်တစ်ဦး ပစ်သတ်ခံရပြီး သေဆုံးသွားတယ်လို့ မိုင်းဘော်ရွာခံတွေက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၈ ရက် ည ၇ နာရီဝန်းကျင်မှာ TNLA တပ်ဖွဲ့ဝင်တစ်ဦးက မိုင်းဘော်နဲ့ မိုနွဲ့ကျေးရွာသွားတဲ့ လမ်းခွဲမှာ ဆိုင်ကယ်နဲ့ သွားနေစဥ် လမ်းမှာ ပစ်သတ်ခံရတာ ဖြစ်ပါတယ်။
“မိုင်းဘော်နဲ့ မိုနွဲ့သွားတဲ့ လမ်းမှာ ပစ်သတ်ခံရတာ။ သေနတ်သံတော့ ကြားရတယ်။ သူမသွားခင် မိုင်းဘော်က စားသောက်ဆိုင်မှာ ရန်ဖြစ်ကြတယ်လို့ ကြားတယ်။ သတ်တဲ့ တရားခံတော့ သေသေချာချာ မသိရသေးဘူး” လို့ ဒီဖြစ်စဥ်ကို သိရှိထားတဲ့ မိုင်းဘော်ဒေသခံတစ်ဦးက ရွှေဖီမြေကို ပြောပါတယ်။
ရွှေဖီမြေထံ ပေးပို့လာတဲ့ ဓာတ်ပုံတွေထဲမှာ ဦးခေါင်းမှာ သေနတ်နဲ့ ပစ်သတ်ခံရတဲ့ ဒဏ်ရာတွေ တွေ့ရပြီး သေဆုံးသူရဲ့ဘေးမှာလည်း ကျဥ်ဆံခွံ ၂ တောင့်လည်း တွေ့ရပါတယ်။
ပစ်သတ်ခံခဲ့ရတဲ့ TNLA တပ်ဖွဲ့ဝင်ဟာ မိုင်းယိုင်အင်ဆိုသူဖြစ်ပြီး ဒီနေ့အထိ ပစ်သတ်သွားတဲ့ တရားခံကိုတော့ ဖမ်းဆီးရမိတာ မရှိသေးဘဲ PSLF/TNLA ရဲ့ ရဲတပ်ဖွဲ့က စုံစမ်းနေဆဲလို့ သိရပါတယ်။
မိုင်းဘော်ကျေးရွာမှာ တအာင်းတပ် TNLA နဲ့ ကချင်တပ် KIA တို့ သွားလာလှုပ်ရှားတဲ့နေရာဖြစ်ပြီး ကချင်၊ တအာင်း၊ ရှမ်းနဲ့ တရုတ်စတဲ့ လူမျိုးပေါင်းစုံ စုပေါင်းနေထိုင်တဲ့ ကျေးရွာလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
