လွေးထွေး၊ ဇွန်လ ၆ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ်ထဲကို စစ်ကောင်စီတပ်က ဗုံးထပ်ကြဲလို့ ဘုန်းကြီး ၁ ပါး ပျံလွန်တော်မူပြီး အရပ်သား ၄ ဦး ဒဏ်ရာရခဲ့ကြောင်း ပြင်ဦးလွင်ခရိုင်ပကဖရဲ့ သတင်းတာဝန်ခံ တစ်ဦးရဲ့ ပြောပြချက်အရ သိရပါတယ်။
သပိတ်ကျင်းမြို့နယ် ကျက်ရိုးပင်ကျေးရွာဘုန်းကြီးကျောင်းကို စစ်ကောင်စီက မနေ့ ဇွန်လ ၅ ရက် ညနေ ၅ နာရီ ဝန်းကျင်မှာ ဂျက်ဖိုက်တာနဲ့ ဗုံးကြဲခဲ့တာ ဖြစ်ပါတယ်။
ပြင်ဦးလွင်ခရိုင် ပကဖ သတင်းတာဝန်ခံက “တိုက်ပွဲဖြစ်တာ မရှိပါဘူး။ ဒီအတိုင်း ဘလိုင်းကြဲသွားတာပါ။ ဆက်တိုက်ကြဲနေလို့ လူထုတွေ ဂရုစိုက်နေထိုင်ကြဖို့လိုတယ်” လို့ ပြောပါတယ်။
ဒါ့အပြင် လူထုတွေက စစ်ကောင်စီတပ်နဲ့ အဝေးကို နေထိုင်ကြဖို့နဲ့ လေကြောင်းရန်ကို ကာကွယ်နိုင်ဖို့ ဗုံးခိုကျင်းတွေ တူးထားကြဖို့ကိုလည်း သူက တိုက်တွန်းထားပါတယ်။
ဇွန်လ ၃ ရက်ကလည်း တိုက်ပွဲဖြစ်တာမရှိဘဲ စဉ့်ကူးမြို့ပေါ်က မြသိန်းတန်ဘုရားနဲ့ ဘုန်းကြီးကျောင်းကို ဗုံးကြဲခဲ့လို့ ကျောင်းဆောင် ၂ ခု ပျက်စီးခဲ့ရတာနဲ့ ဇွန်လ ၁ ရက်ကလည်း သပိတ်ကျင်းမြို့နယ် ၄ မိုင်ရွာက စာသင်ကျောင်းကို ဗုံးကြဲခဲ့လို့ နှစ်ထပ်ကျောင်းဆောင် တစ်ဆောင် ပျက်စီးခဲ့ပါတယ်။
အပစ်အခတ်ရပ်စဲရေး ၁ လ ထပ်တိုးထားတဲ့ စစ်ကောင်စီတပ်ဟာ တော်လှန်ရေးတပ်တွေ ထိန်းချုပ်ထားတဲ့ စဉ့်ကူး၊ သပိတ်ကျင်း စတဲ့မြို့နယ်တွေကို ဗုံးကြဲနေသလို TNLA ထိန်းချုပ်ထားတဲ့ နောင်ချိုမြို့နယ်ကိုလည်း မြေပြင်ကနေ ထိုးစစ်ဆင် တိုက်ခိုက်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
