လွေးလာဝ်ဇာရ်၊ ဇွန်လ ၁၂ ရက်၊ နမ့်ခမ်း
တအာင်းတပ် ထိန်းချုပ်တဲ့ ရှမ်းမြောက် နမ့်ခမ်းမြို့နယ် လွယ်ဟွမ်ကျေးရွာအုပ်စု တွန်းကော်ကျေးရွာမှာ ဘတ်ထရီအိုး ပေါက်ကွဲရာကနေ နေအိမ်တစ်လုံး မီးလောင်ပြာကျသွားခဲ့တယ်လို့ သိရပါတယ်။
မနေ့ ဇွန်လ ၁၁ ရက် ည ၈ နာရီမှာ ဘက်ထရီအိုး ပေါက်ကွဲမှု ဖြစ်ပွားခဲ့ရာ တွန်းကော်က နှစ်ထပ်အိမ်တစ်လုံး မီးလောင်ပြာကျသွားခဲ့ပြီး လူထိခိုက်မှုတော့ မရှိဘူးလို့ ဆိုပါတယ်။
ဖြစ်စဉ်သိရှိသူ ဒေသခံတစ်ဦးက “မနေ့ညမှ ဖြစ်သွားတာ။ ဘက်ထရီအိုး ပေါက်တာ။ သူတို့အိမ်က နှစ်ထပ်အိမ် မီးလောင်သွားတာ။ သူတို့ရဲ့ ဆုံးရှုံးမှုတန်ဖိုးတော့ များတယ်။ တွန်းကော်ရွာထဲက လူတွေရော ဘေးရွာက တာပုံရွာလည်း ရွာလုံးကျွတ်လာပြီး မီးလာငြိမ်းတယ်” လို့ ပြောပါတယ်။
ဆန်၊ စပါး၊ မြန်မာငွေ သိန်း ၃၀ နဲ့ တရုတ် ယွမ် ၈ သောင်းအပါအဝင် စုစုပေါင်းတန်ဖိုး သိန်း ၅၀၀ နီးပါး မီးလောင်ဆုံးရှုံးခဲ့တယ်လို့ ဆိုပါတယ်။
ပြီးခဲ့တဲ့ ဧပြီလ ၂၁ ရက်တုန်းကလည်း သီပေါမြို့မှာ ဖယောင်းတိုင်မီး ထွန်းထားရာကတစ်ဆင့် မဟာမြတ်မုနိကျောင်း မီးလောင်မှု ဖြစ်ပွားခဲ့ပါတယ်။
ပြီးခဲ့တဲ့ ဇန်နဝါရီလကနေ မေလအထိ ရွှေဖီမြေ ရရှိထားတဲ့ စာရင်းအရ မန်တုံ၊ နမ့်ခမ်း၊ ကွတ်ခိုင်၊ ကျောက်မဲ၊ သီပေါ၊ နမ္မတူ၊ မိုးကုတ်၊ မိုးမိတ်စတဲ့ မြို့နယ်တွေမှာ မီးလောင်မှု အကြိမ်ရေပေါင်း ၁၈ ကြိမ် ဖြစ်ပွားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
