မိုင်းအရှိုင်း၊ ဇူလိုင် ၅ ရက်၊ နမ့်ဆန်
တအာင်းတပ်- TNLA ထိန်းချုပ်ထားတဲ့ နမ့်ဆန်မြို့နယ် ဇယ်တုန်ဟုန်းကျေးရွာက နေအိမ်တစ်အိမ်ကို သူခိုးတွေဖောက်ထွင်းဝင်ရောက်ပြီး ပိုက်ဆံ ကျပ်သိန်းပေါင်း ၃၀၀ ကျော်နဲ့ တန်ဖိုးရှိ ပစ္စည်းတွေ ခိုးယူသွားတယ်လို့ နီးစပ်သူ ရွာခံတစ်ဦးက ရွှေဖီမြေကိုပြောပါတယ်။
ဖြစ်စဉ်က ပြီးခဲ့တဲ့ ဇွန်လ ၂၇ ရက် နေ့လည်ပိုင်းအချိန် ကာယကံရှင် ဆွေမျိုးရဲ့ အသုဘသွားပို့တဲ့အချိန်မှာ သူခိုးတွေ ဖောက်ထွင်းခဲ့တာဖြစ်ပါတယ်။
နီးစပ်သူ ရွာခံတစ်ဦးက “ပိုက်ဆံက မြန်မာငွေသိန်း ၁၈၀ကျော် နဲ့ တရုတ်ငွေ ၂၅၀၀၀ ကျော်။ ရွှေဆွဲကြိုး ၁ကျပ်သားကျော် တစ်ကုန်း ပါသွားတယ်” လို့ ပြောပါတယ်။
ဖြစ်စဉ်ဖြစ်ပွားပြီးနောက် TNLA ရဲတပ်ဖွဲ့ လာရောက်စုံစမ်းပေမဲ့ လက်ရှိအချိန်ထိ သူခိုးတွေကို ဖမ်းဆီးနိုင်ခြင်းမရှိသေးဘဲ လွတ်မြောက်နေဆဲ ဖြစ်တယ်လို့ သူက ဆက်ပြီးပြောပါတယ်။
“ရဲတွေလဲခေါ်တယ်။ ဗေဒင်လဲသွားမေးတယ်။ အခုထိတော့ ဘာမှထူးခြားတာမတွေ့သေးဘူး”
ဇယ်တုန်ဟုန်းကျေးရွာမှာ အရင်ကလည်း ဘုန်းကြီးကျောင်းက ဘုန်းကြီးပိုက်ဆံခိုးမှုတွေ ရှိခဲ့ဖူးပြီး အဲတုန်းက သူခိုးတွေကို ပြန်လည်ဖမ်းဆီးနိုင်ခဲ့တယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
