လွေးလာဝ်ဇာရ်၊ ဇွန်လ ၃ဝ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိပ်မူ(ဆိုင်းတောင်)ကျေးရွာ ရပ်ကွက် (၃) မှာ ခိုင်ကြည်ဇင် ဆီဆိုင်က ဆီသိုလှောင်ထားတဲ့နေရာ မီးလောင်မှုဖြစ်ပွားခဲ့တယ်လို့ ဖြစ်စဉ်သိရသူ အမျိုးသားတစ်ဦးက ပြောပါတယ်။
ဒီနေ့ ဇွန်လ ၃ဝ ရက် မနက် ၁ဝ နာရီခွဲဝန်းကျင်မှာ မီးလောင်မှုဖြစ်ပွားခဲ့ပြီး မီးလောင်မှုအတွင်း တခြားသော ထိခိုက်ပျက်စီးမှု မရှိပေမဲ့ ဓာတ်ဆီတွေကိုတော့ ဆုံးရှုံးသွားတယ်လို့ ဆိုပါတယ်။
“ဆိုင်ရှင်ကို မေးကြည့်တော့။ သူတို့ရဲ့ ခြံအနောက်မှာ စပြီးလောင်တာတဲ့။ လှမ်းမြင်တော့ အိမ်အပေါ်ကနေ ခေါင်းအုံးတွေ စောင်တွေ မီးငြိမ်းအောင်လို့ဆိုပြီး ပစ်ချတာတဲ့။ အဲကနေပြီး ဆီတိုင်ကီနဲ့ လာကူတာ။ တိုင်ကီအကြီးတွေ လောင်သွားရင် ကွဲမှာလေ။ အဲဟာကို မလောင်အောင်လို့ ရေနဲ့ဖြန်းလိုက်တာ။ အဲထဲမှာရှိတဲ့ ဓာတ်ဆီကို ရေနဲ့ ထိုးထည့် ဆီနဲ့ ရေနဲ့ ရောလိုက်တာ။ ဓာတ်ဆီတွေကိုတော့ ဆုံးရှုံးသွားတာပေါ့” လို့ အမျိုးသားတစ်ဦးက ပြောပါတယ်။
ပြီးခဲ့တဲ့ မေလတုန်းကလည်း ဖားကန့်မြို့နယ် ဆိုင်းတောင်ရွာ မှော်ရှန်ရက်ကွက်က နေအိမ် (၂) လုံး မီးလောင်ဆုံးရှုံးခဲ့ဖူးပါတယ်။
အဲဒီဆိုင်းတောင်ကျေးရွာမှာ နှစ်စဥ်လိုလို မီးလောင်မှုဖြစ်ပွားခဲ့တယ်လို့ အထက်ပါ အမျိုးသားဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
