လွေးထွေး၊ ဇွန်လ ၁၀ ရက်၊ မိုးကုတ်
မန္တလေးတိုင်း မိုးကုတ်မြို့မှာ သဲတင်တဲ့ကားတစ်စီးက ရပ်ကွက်ထဲက အသက် ၆၂ အရွယ် အဖွားကို တိုက်မိလို့ ပွဲချင်းပြီး သေဆုံးခဲ့ကြောင်း ဖြစ်စဉ်ကိုသိရသူ သတင်းအရင်းအမြစ်တစ်ဦးက ပြောပါတယ်။
မနေ့ ဇွန်လ ၉ ရက် နေ့လယ် ၁ နာရီ ဝန်းကျင်မှာ မင်းတံတားကနေ မိုးကုတ်မြို့ ရှောလီဝိုင်း ရပ်ကွက်ဘက်ကို သဲတင်လာတဲ့ကားက ကားနောက်ဆုတ်ဖို့ လုပ်နေချိန်မှာပဲ အသက် ၆၂ အရွယ် ယာမချိုဆိုသူကို ဝင်တိုက်ခဲ့တာ ဖြစ်ပါတယ်။
“အိမ်ဆောက်ဖို့ သဲတင်လာတာ။ သူကားနောက်ဆုတ်ရင်း ဝင်တိုက်တာ။ ခြေထောက်ထိသွားတာ။ အဲတာကို ဆေးရုံပို့ဖို့ လုပ်နေကြတုန်းမှာဘဲ သေသွားတာ” လို့ သတင်းအရင်းအမြစ်တစ်ဦးက ပြောပါတယ်။
ဇွန်လ ၁၀ ရက် မနက်အထိ ၎င်းအမျိုးသားကို မိုးကုတ်ရှိ တအာင်းတပ်ရဲ့ ရဲတပ်ဖွဲ့က ရဲစခန်းမှာ ဖမ်းဆီးထိန်းသိမ်းထားဆဲဖြစ်တယ်လို့ သူက ဆိုပါတယ်။
မိုးကုတ်မြို့မှာ မကြာခဏ ယာဉ်တိုက်မှုတွေ ဖြစ်ခဲ့ပေမဲ့ အခုလို လူသေဆုံးတာတော့ မရှိသေးကြောင်း ဒေသခံတွေရဲ့ ပြောပြချက်အရ သိရပါတယ်။
၎င်းဖြစ်စဉ်မျိုး မိုးကုတ်မြို့မှာ ထပ်မဖြစ်ရအောင် ယာဉ်ကြီး၊ ယာဉ်ငယ် မောင်းသူတွေက ယာဉ်စည်းကမ်း၊ လမ်းစည်းကမ်း လိုက်နာပြီး ဂရုတစိုက် မောင်းကြဖို့ မိုးကုတ်ဒေသခံတွေက တောင်းဆိုထားကြပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
