မြတ်နိုး၊ ဇွန် ၁၂ရက်၊ ဖားကန့်
ကချင်ပြည်နယ်၊ ဖားကန့် နဲ့ လုံးခင်းကြားရှိ မှော်ဆီစာရွာမှာ ဒီနေ့ ဇွန်လ ၁၂ ရက်နေ့ မနက် အစောပိုင်းက အရပ်သား ၃ ဦး ပစ်သတ်ခံရကြောင်း ဒေသခံတွေဆီက သိရပါတယ်။
“မှော်ဆီစာ လမ်းဆုံမှာ ဇွန်လ ၁၂ ရက်နေ့ မနက် ၆ နာရီခန့်က ပြည်သူ ၃ ယောက်ကို စစ်ကောင်စီနဲ့ ပြည်သူ့စစ်တွေ ပစ်ခတ် သတ်ဖြတ်သွားတာ” လို့ ဒေသခံ တစ်ဦးက ပြောပါတယ်။
လမ်းဘေးထိုင်နေတာကို ဝင်ပစ်သွားတာဖြစ်ပြီး ပစ်သတ်ခံရတဲ့ ၃ ယောက်က အဲနားထိုင်နေကျ အရက်သမားတွေ ဖြစ်တယ်လို့ သူက ပြောပါတယ်။
ဒီဖြစ်စဉ်အပြီး ဒေသခံတွေ အနေနဲ့ အသွားအလာ အပြောအဆို သတိထားဖို့ လိုအပ်တယ်လို့ ဆိုပါတယ်။
“ဒီနေ့မနက်မှာ မှော်ဆီစာ ရွာမလမ်းမကြီးထိပ်မှာ လူ ၃ ယောက်ပစ်သတ်ခံရတယ်။ ထိုင်နေတဲ့ နေရာတင် အပြစ်ခံရတာပါ။ သူတို့က အရက်သမားတွေပါ”လို့ နောက်ထပ် ဒေသခံ တစ်ဦးက ရွှေဖီမြေကို ပြောပါတယ်။
ဒေသတွင်းသတင်းဌာနတွေမှာတော့ အဲဒီပစ်ခတ်မှုဟာ စစ်ကောင်စီက ပြုလုပ်သွားတယ်ဆိုပေမယ့် ဘယ်သူလုပ်သွားလဲဆိုတာ အတည်မပြုနိုင်သေးဘူးလို့ အဲဒေသခံက ဆိုပါတယ်။
မှော်ဆီစာထဲမှာ အခြေအနေတွေ ရှုတ်ထွေးနေပြီး အရပ်သားတွေ အဖမ်းစီးခံရတာတွေ ရှိသလို ပစ်သတ်ခံရနေတာတွေလည်း ရှိနေတာကြောင့် နေအိမ်ထဲ မှာသာ နေကြဖို့ ဒေသခံတွေက တိုက်တွန်းထားကြပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
