လွေးလာဝ်ဇာရ်၊ ဇွန်လ ၂၀ ရက်၊ ဖားကန့်
ကချင်ပြည်နယ် ဖားကန့်မြို့ မှော်ဝမ်းလေး၊ မှော်ဝမ်းကြီးကျေးရွာမှာ စစ်ကောင်စီတပ်က လေယာဉ်နဲ့ ဗုံးလာကြဲချမှုကြောင့် ၂ ဦး ထိခိုက်ဒဏ်ရာရတယ်လို့ ဖားကန့်ဒေသခံတစ်ဦးက ရွှေဖီမြေကို ပြောပါတယ်။
မနေ့ ဇွန်လ ၁၉ ရက် နေလယ် ၃ နာရီခွဲဝန်းကျင်မှာဖြစ်ပွားခဲ့ပြီး ဖားကန့်မြို့နယ် မှော်ဝမ်းလေးရွာရဲ့ ဘုန်းကြီးကျောင်းအနီးကို ဂျက်လေယာဉ်တစ်စီးနဲ့ လာရောက်ဗုံးကြဲချခဲ့တာ ဖြစ်ပါတယ်။
“မနေ့ညနေမှာ လေယာဉ်နဲ့ လာကြဲတာဟုတ်တယ်။ ကလေး တစ်ယောက်အပါ ၂ ယောက်ထိတယ်လို့ ပြောတယ်။ သူတို့ရှိနေတော့ သွားမကြည့်ရဲဘူး။ ထိခိုက်ပျက်စီးမှုတွေလည်း ရှိတယ်” လို့ ပြောပါတယ်။
မှော်ဝမ်းကြီးနဲ့ မှော်ဝမ်းလေးကျေးရွာမှာ နှစ်ရွာစလုံး လာရောက်ဗုံးကြဲတိုက်ခိုက်ခဲ့တဲ့အပြင် လက်နက်ကြီးတွေလည်း နေ့စဉ်ပစ်ခတ်နေတယ်လို့ နောက်ထပ် ဒေသခံတစ်ဦးက ဆိုပါတယ်။
“သူတို့က လေယာဉ်တစ်စီးနဲ့ နှစ်ရွာစလုံး လာကြဲချတာ။ ကျောင်းအနီးတွေဘဲ ကြဲတာ။ တိုက်ပွဲကတော့ နားထားတယ်။ လက်နက်ကြီးတွေလည်း နေ့တိုင်းပစ်နေကြတာ။ ဘယ်ဘက်ကိုပစ်လို့ ဘယ်သူက ပစ်လဲဆိုတာတော့ မသိဘူး။ အသံကတော့ နေ့တိုင်းဘဲ” လို့ ပြောပါတယ်။
မှော်ဝမ်းလေးက နှစ်ခြင်းဘုရားကျောင်းပေါ်မှာ စစ်ကောင်စီတပ်တွေက တပ်စွဲထားပြီး မှော်စီးစာကျေးရွာရဲ့ ဘုန်းကြီးကျောင်းမှာလည်း တပ်စွဲထားသလို အခုလက်ရှိ စစ်ကောင်စီတပ်နဲ့ ပူပေါင်းတပ်တို့အကြားက နှစ်ဖက်တပ်စလုံး စစ်ရေးတင်းမာနေကြတယ်လို့ ၎င်းက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
