အိုက်ပွီး၊ ဇွန်လ ၁ ရက်၊ မီဇိုရမ်
အိန္ဒိယနိုင်ငံ၊ မီဇိုရမ်ပြည်နယ်၊ ကျန်ဖိုင်ခရိုင်၊ ဗာဖိုင်းကျေးရွာမှာ မိုးရွာသွန်းပြီး မြေပြိုကျတာကြောင့် ကိုယ်ဝန်ဆောင် အမျိုးသမီးတစ်ဦးအပါအဝင် မြန်မာစစ်ဘေးရှောင် ၃ ဦး သေဆုံးခဲ့တယ်လို့ မြန်မာစစ်ဘေးရှောင်တွေဆီက သိရပါတယ်။
မနေ့ မေလ ၃၁ ရက် မနက်က ရွာသွန်းတဲ့မိုးကြောင့် ဗာဖိုင်းကျေးရွာက မြန်မာစစ်ဘေးရှောင်တွေ ငှားရမ်းနေထိုင်တဲ့ ဦးလဲန်းခွေထန်နာရဲ့ နေအိမ်ဟာ မြေပြိုကျမှုထဲ မျော့ပါသွားပြီး မြေပိတ်မိကာ အသက်သေဆုံးခဲ့ရတာ ဖြစ်ပါတယ်။
“အိမ်အပေါ်ဘက်ကနေ မြေပြိုတာ။ အဲမြေနဲ့အတူ ဦးလဲန်းခွေထန်နာ အိမ်ဟာလည်း မျော့ပါသွားတာပါ။ အိမ်ထဲမှာရှိတဲ့သူတွေအားလုံး မြေပိတ်မိပြီး သေဆုံးခဲ့ရတာပါ။ မနေ့က မိုးအရမ်းရွာတယ်။ မီဇိုရမ်ပြည် အနှံမှာ မြေပြိုကြတယ်။ လူတွေလည်း ပိတ်မိနေကြတယ်။”လို့ မြန်မာစစ်ဘေးရှောင်တစ်ဦးက ရွှေဖီမြေသို့ ပြောပါတယ်။
အဲဒီ မြေပြိုမှုကြောင့် သေဆုံးသူတွေဟာ ဦးလဲန်းခွေထန်းနာ (၇၁) နှစ်၊ ၎င်းသမီးဖြစ်သူ ဒေါ်လာလ်နိုက် ထွာမ်မီး (၄၈ ) နှစ်နဲ့ လာလ်နိုက် ထွာမ်မီးရဲ့ ချွေးမဖြစ်သူ ကိုယ်ဝန်ဆောင်မိခင် လာလ်ရဲမ်နီအဲန်းအီး (၂၈)နှစ်တို့ဖြစ်ပါတယ်။
ဒါ့အပြင် မြန်မာစစ်ဘေးရှောင်နှစ်ဦးဖြစ်တဲ့ ပဲခ့်မှင်းထန်းနာ (၂၆ ) နှစ်၊ လာလ်ဇာမ်မာ (၄၇) နှစ်လည်း ပြင်းထန်ဒဏ်ရာရရှိပြီး ဆေးရုံမှာ ဆေးကုသမှုခံယူနေရပါတယ်။
“သေဆုံးသူ ကိုယ်ဝန်ဆောင်အမျိုးသမီးရဲ့ အမျိုးသားက ခြေထောက်ခွဲစိပ်ထားရတယ်။ နောက်တစ်ယောက်ဧည့်သည် သူလည်းပြင်းထန်ဒဏ်ရာရတယ်။ အခု ကျန်ဖိုင်ဆေးရုံမှာ ဆေးကုသနေတယ်။ သေဆုံးသူတွေကို မနေ့ကပဲ သဂြိုလ်လိုက်ပါပြီ။”လို့ မြန်မာစစ်ဘေးရှောင်တစ်ဦးက ရွှေဖီမြေသို့ ပြောပါတယ်။
အဲဒီမြန်မာစစ်ဘေးရှောင်တွေဟာ စစ်ကိုင်းတိုင်း၊ ကလေးမြို့နယ်၊ မောစီကျေးရွာကဖြစ်ကြပြီး မီဇိုရမ်ပြည်နယ်၊ ကျန်ဖိုင်ခရိုင်၊ ဗာဖိုင်းကျေးရွာကို စစ်ဘေးရှောင်လာကြသူတွေလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
